Жасөспірімдердің спортқа бет бұрып, арманына жету жолындағы мақсаттарын айқындап, саналы ғұмыр кешуді қалайтыны көңіл қуантады. Дзюдо күресінен облыстық, республикалық жарыстарда сан мәрте жеңіске жеткен Арман Мыса жайлы былтыр көлемді сұхбатымызды оқырман назарына ұсынған едік. Аймен ауылының тұрғыны, бүгінде М.Горький атындағы орта мектептің 10 сынып оқушысы Арман Мыса бала күнінен-ақ барған бәйгесінде топ жарып, болашағынан үлкен үміт күттіріп отырған дзюдошы. Арманның жеңісті жолы жалғасуда. Жуырда Арман Түркия мемлекетінің Анталия қаласында өткен ашық дзюдо күресінен І орынды еншілеп, Еуропа кубогінің жеңімпазы атанды.

24 мемлекеттен 500-ге жуық спортшы қатыс-қан дзюдо додасында оңай шағылар жаң-ғақтың болмайтыны анық. Дегенмен, ақжолтай жаңалықпен оралған сайыпқыранымыз Түркия төріндегі белдесулер қиын болмағанын айтты. «Жарыста 5 қарсыласпен белдестім. 2 түрік, 2 грузин, 1 қазақ балуаны қарсылас болды. Финалда грузин спортшысымен күрестім. Ұстазда-дарымның берген ақыл-кеңесі мен тыңғылықты дайындықтың нәтижесінде осы жеңіске жеттім» – дейді жас спортшы.

Болашақта олимпиада чемпионы болуды мақсат еткен балуан арман жолында аянбайтынын жеткізді. Біз де Арманның бағы мен бабы, таланты мен тәжірибесі арта берсін деп тіледік.

Ринат НАРХАНОВ.