Қазақ поэзиясында үлкен қолтаңба қалдырған Мұқағали Мақатаев өлеңдерін білмейтін қазақ жоқ шығар, сірә. Қазақтың ақиық ақыны – Мұқағали:

«Сая болып жаныңа емен, терек,

Жетер енді жатқаның көлеңкелеп.

Өгейсінбей өзі болып қалу үшін,

Өнер керек ұрпаққа, өлең керек» – деп жырлаған екен.  Небәрі қырық бес жылдық қысқа ғұмырында артына өшпестей із қалдырған ақиық ақынның өлеңдерін бүгінгі ұрпақ сүйіп оқып,  жатқа айтып жүр.

Жуырда Шелек мәдениет үйінде Еңбекшіқазақ ауданының жастар ресурстық орталығы, «Jas Otan» жастар қанаты аудандық филиа-лының ұйымдастыруымен қазақтың ақиық ақыны Мұқағали Мақатаевтың туғанына 90 жыл толуына орай «Әр өлеңі – бір әлем» атты жастар арасында сазды поэзия кеші өтті. Ақынды еске алу, әрі өлең құдіреті арқылы қазақ тілінің мәдениетін көтеру, рухани құндылықты қастерлеуге баулу, отансүйгіштік патриотизмге тәрбиелеу мақсатында өткен бұл кешке Қаракемер, Қаратұрық, Көктөбе, Бартоғай, Сөгеті, Шелек ауылдық округтерінің өнерлі жастары қатысып, өзара бақ сынасты.

Ақынның өлеңдері мен поэмаларын бейне қойылыммен көрсету арқылы өнерлерін көрсеткен жас талапкерлердің талабын бағалаған әділ қазылар алқасының ұйғарымымен Қаратұрық округінен келген екі топтың бірі Тауқаратұрық ауылының жастары бірінші, Сөгеті ауылдық округі екінші, Шелек үшінші орынды иемденіп, арнайы дипломдармен, бағалы сыйлықтармен марапатталды. Қатысушыларға Алғыс хаттар табысталды. 

Анарбек МӨКІШҰЛЫ.