Кітап – уақыт пен кеңістіктің тынысына толы адамзат ойының жемісі, қоғамның мәдени күштерін дамытудың қуатты құралы, қайнар бұлағы. «Мәдениет пен өнер ұлы болмайынша, ұлт ұлы болмайды» дегендей, егеменді мемлекетіміздің болашағы жастардың мәдени танымдық қабілетін қалыптастыратын мәдени ортаның бірі кітапхана екенін бүгінде білмейтін адам кемде кем.

Кітап оқу да – денеге жасалған физикалық жаттығу секілді. Кітап оқуды үлкен жұмыс көріп, оны қиындатудың қажеті жоқ. Керісінше, оны дағдыға айналдыру керек. Әрине, кітап оқудың пайдасы зор екенінде сөз жоқ. Жақсы кітапты оқу адамның білім көкжиегін кеңейтіп, ішкі жан дүниесін байытады, есте сақтау қабілетін арттырып, сөздік қорын көбейтеді, ойлау қабілетін арттырып, өз пікірін еркін жеткізуді дағыландырады.

Біздің кітапханаға оқырман сұранысындағы көптеген кітап жыл бойы түсіп тұрады. Соңғы уақытта кітапхана қорын толықтырған балаларға арналған кітаптардың біразына тоқтала кетуді жөн көрдім.

Б.Сарыбайдың «Ақтабан» туындысында балалардың ойына ой қосып, толғандырары сөзсіз. Автор – өмірді өлеңмен өрнектеген ақын ғана емес, қара сөздің де шебері. Ә.Беркімбайдың «Дәуіт атайдың ертегілері» аңыз-әңгімелерінде  Ұлы Отан соғысы кезіндегі ауыл оқиғалары өте қызықты баяндалады. Белгілі балалар жазушысы Ә.Файзуллаұлының «Өтірік айтпайтын күн» ертегі-аңызында адамдық, адалдық, ар туралы айтылса, Ә.Қалдыбаев «Сағындым сені, інім» атты әңгімелерінде бауырмалдық, ағалық ақыл, інілік ізет, адалдық атаулыны болашақ ұрпақтың тұла бойына шебер тоғыстыра білген. Ал Г.Шойбекова «Тұғырылханның Көк Туы» әңгімесінде қазақ даласында шынығып, балалардың кешегі-бүгінгі тағдыр-талайлары, болмыс-бітімі суреттеледі. Жәндіктердің таңғажайып өмірін қызықты әңгімелеген В.Кострючиннің «Ержүрек құмырсқа» ертегісі де – балаларға ой салатын дүние. Ю.Серебрянскийдің «Қазақстандық ертегілері» әлемдегі ең жайлы өлкені суреттейді.

Бұл аталғандар – кітапхана сөресіндегі мол байлықтың кішкентай бөлігі ғана. Егер кітапханаға келер болсаңыз, таусылмас қазынаға тап боларыңыз анық.

Олай болса, қымбатты біздің оқырман, біздің кітапханаға келіңіз! Жаңа кітаптармен өзіңіз танысып көріңіз. Оқимын деген жанға біздің есігіміз әрдайым ашық!

Күлия Саурықова,

аудандық кітапхана қызметкері