Өнерлі ұлдарын өнеге қылып, әрдайым даралап, дәріптеп отыратын халықпыз. Осы дәстүрімізден аттамаған аудандық кітапхананың қызметкерлері оқырмандарына әдемі кеш ұйымдастырды. Кештің басты қонағы – Шаяхмет Құсайынұлы.
Халықаралық Жазушылар одағының, Қазақстан Жазушылар одағының және Журналистер одағының мүшесі, Еңбекшіқазақ ауданының құрметті азаматы, ақын, жазушы, журналист Шаяхмет Құсайынұлы биыл 70 жаста. Осынау мерейтойға орай ұйымдастырылған «Жыр жазған, мен – қазақтың бір баласы» атты әдеби кешке ақынның жұбайы, достары мен оқырмандары жиналды. Кітапхана әдіскері Гүлия Саурықова Шаяхмет Құсайынұлының өмір жолына аз-кем тоқталып, қызықты деректермен бөлісті. Ол кісінің 30-ға жуық кітап жазған ақын, жазушы ғана емес, қара қылды қақ жарған шыншыл да әділ журналист ретіндегі еңбектеріне де ерекше тоқталды. Достары ақын жайлы әдемі естеліктерін айтып, оқырманға керемет көңіл сыйлап, Шаяхмет Құсайынұлын жақыннан таныта түсті. Талғардан арнайы келген әнші, ұстаз, Нұржамал Ержанқызы ақынның сөзі мен сазгер Мейрамбай Бектасовтың әніне жазылған «Еңбекшіқазақ вальсі» әнін орындады. Абылайхан атындағы орта мектептің оқушылары кештің қызықты өтуіне үлес қосып, ақынның өлең-жырын жатқа айтып, домбырамен ән салып, би биледі.
Ақын қонақтармен пікір алмасып, әңгіме-дүкен құрып, кездесу әдемі өтті.
Құралай МҰРАТҚЫЗЫ
