Спорттың адам өміріндегі орны ерекше екендігі  баршамызға мәлім. Спортпен айналысқан адамның денсаулығы мықты, өзі шымыр болады. “Тәні саудың – жаны сау” – дегендей  спорттың қай түрімен айналысса да дені сау болмақ.
Салауатты өмір салты дегеніміз – адамның тұрмыстағы күнделікті қалыптасқан дағдысы мен әдеті бойынша еңбек ету, бос уақытын дұрыс пайдалана білуі  болғандықтан Еңбекшіқазақ ауданы, Түрген ауылы М.Ломоносов орта мектебінде оқушылардың салауатты өмірге деген ықылас жігерін қалыптастыру мақсатында “Тәні саудың – жаны сау” спорттық іс-шара аясында айлық өтті. Айлық қашықтықтан "Біздің жеңімпаздарымыз, біздің мақтанышымыз!" тақырыбында сынып сағаттарымен ашылды. Оқушылар белсенділік танытып, әйгілі спортшыларымызды үлгі тұтатынын білдіріп, ал кері байланыс ретінде «Болашақ спортшы болғым келеді» тақырыбында 5-11 сыныптар арасында оқушылар  эссе арқылы өз ойларын жеткізді.
Тыныс алу жаттығулары – ауамен емделуді дұрыс пайдалана білу, тыныс алу мүшелерінің жұмысын жақсарту мақсатында оқушыларға  "Тыныс алу гимнастикасы" көрсетілді. Осындай  жаттығулар  оқушылардың спортпен шұғылдануға қызығушылықтарын арттырып, салауатты өмір салтын ұстануға, өмірде дұрыс таңдау жасауларына тигізер септігі мол. 
Ендеше, Абай атамыз айтпақшы, «Тамағы тоқтық, жұмысы жоқтық, аздырар адам баласын» дегендей, еңбексіз, белсенді дене қозғалысынсыз мықты денсаулық, бақытты өмір жоқ.

Айнаш Жанатова,

қазақ тілі пәнінің мұғалімі

Ломоносов мектебі