Қазақ халқы үшін, жалпы Наурызды тойлайтын барлық Шығыс халықтары үшін Ұлыстың Ұлы күні, яғни наурыздың 21-нен 22-не қараған түн де өзінше ерекше.Ұлыстың Ұлы күнінің ажырамас бір бөлігіндей әдемі салттарымыз бен әсем дәстүрлеріміз осы күні естен шығарылмайды. Қазақ халқы Жаңа жылын Құдайға деген шексіз ырзалықпен, өлшеусіз үмітпен, келешекке деген зор махаббатпен қарсы алған. Жылдың бастауы болғаннан кейін әз Наурызға ерекше мән беріп, құт-береке әкелетін мейрамды қарсы алуға ерте қамданған.
Еліміздегі карантиндік шектеу шаралары кезінде 2 жыл тойланбаған ұлттық мейрамды биылғы барыс жылы Еңбекшіқазақ ауданы ерекше атап өтті. Жыл сайынғы дәстүрмен ауыл тұрғындары алаңға жиналып, ақ дастархандарын жайып, мерекелік концерт өткізіп жақсы көңіл – күйде бір серпілді.
Әз Наурыз осынысымен де ерекше, осынысымен де өміршең. Наурыз мейрамын Қазақстанда тұрып жатқан барша ұлт өкілдері асыға күтеді. Бұл – мызғымас достықтың айқын көрінісі. Ертеден – ақ қазақ халқы, жалпы, түркі тілдес бауырлар қыстан аман-есен шығып, бойға қан, жанға жылу ұялататын Ұлыстың ұлы күнін осылай дүбірлетіп тойлап келеді.
Өзім жұмыс атқаратын Бәйдібек би ауылындағы Н.Островский атындағы орта мектепте жоспар бойынша көптеген іс – шаралар ұйымдастырылды. Ұстаздар қауымы ата – аналар, оқушылармен бірге салт – дәстүр, әдет – ғұрыптарды жас жеткіншектерге дәріптеп, мектеп қабырғасында ерекше мерекелік кештерді өткізді. 14 наурыздан басталған «Ең сәнді қазақ киімі стиліндегі мұғалім» қазақ костюмдерін киіп келуден басталған шара сынып сағаттарымен қазақтың ұлттық ойындарын өткізумен ұласып, мәдениет үйінің алдында Наурыз көже берумен аяқталды. Той-думанға ауданнан басшылар да келіп қатысты. Ауыл азаматтары, мектеп ұжымы, емхана ақ шаңқан киіз үй тігіп, құтты қонақтарын, зейнеткерлер қауымын ықыластарымен қуантып, төріне шығарды.
Бұл күні өнерлі балалар да ән-билерімен көктем мерекесін көріктендіре түсті. Елдегі бейбітшілікті айрықша бағалайтын қазақстандықтар Ұлыстың ұлы күнінде бір-біріне тек жақсылық тілеп, мерекені есте қаларлықтай етіп атап өтті.
Майгүл Сатымбай,
Н.Островский атындағы орта мектептің
педагог- ұйымдастырушысы
