Ұзақ жол жүріп келе жатқан адам қиядан қиялап, ойдан ойыстап, өтіп келе жатып бір бекетке өкше тірегенде: «Артта қаншама із қалды, енді алдымда не көрмек бар?» - демей ме? Дәл осы сияқты кез-келген адамның белгілі бір уақытта осындай ой сезінетіні де бар. №1 Рахат орта мектебінің  кітапханасы Ұлыстың ұлы күні қарсаңында  «Дария кеуде тау мүсін, қарттарым аман-саумысың?» тақырыбында «Дара жол» ток-шоуының негізінде сыр-сұхбат кешін өткізді.

«Еңбекшіқазақ» қоғамдық-саяси апталығының бас редакторы, журналист Хайролла Ахметжанов пен ақын, Жазушылар одағының мүшесі Шаяхмет Құсайынұлының еңбек жолы мен шығармашылықтары «дара жолға» ұйытқы болды. Сонымен қатар, композитор, мәдениет қайраткері Мейрамбай Бектасов, мектебіміздің қамқоршылық кеңесінің төрайымы Қадірхан Жұмабекова мен Түргенбай  Букаев  кеш қонақтары қатарын толықтырды.

Өлкеміздің өркендеуіне өмірлерін арнап келе жатқан дара тұлғаларымыздың өткен өмірлері көз алдымыздан бір сырғып өтті. Сара жолдарынан сыр шерткен қонақтарымыз  оқырман оқушыларымыздың сұрақтарына жауап беріп, өсиетті өнегелерімен сөз өрбітті. Кеш барысында Шаяхмет Құсайынұлының өлеңдерін 8 «а» сынып оқушысы С.Жарылқасын, 10 «а» сынып оқушысы Н.Ганибай оқып, ақынның сөзіне жазылған сазгер М.Бектасовтың «Құрдастар», «Алғашқы махаббат» әндері орындалды. Бұл  кеш мықты журналист, сырлы ақын, ардақты әке, шынайы дос Хайролла Қасымұлы мен  Шаяхмет Құсайынұлының «Дара жолы» болатын. Әр адамның өмірде өз жолы бар, оны дара ету әркімнің өз қолында!

Меруерт ЕРБОЛАТҚЫЗЫ,  кітапханашы.