Р.Тоқатаев атындағы орта мектепте Қазақстан Жазушылар одағының мүшесі, ақын, аудармашы, «Серпер» сыйлығының лауреаты, «Мөлдір бұлақ» республикалық журналының бас редакторы Саят Қамшыгермен «Ақындығым бастау алған тұмаңнан» атты әдеби кездесу өтті. Іс-шараға аталған білім ордасының ұстаздары мен оқушылары қатысты.
Мектеп кітапханашысы Саяш Садыкованың ұйымдастыруымен өткен шарада жас шәкірттер жазушыға сұрақтар қойып, онымен бірге «Тастамашы, ана!» повесін талқылады. Автор терең тебіреніп, сонымен бірге жас башқұрт жазушысы Айгиздің шеберлігіне таңданды. Қамшыгер бұл туындыны бірден қазақ тіліне аударуға ниет білдірді. «Тастамашы, ана!» – көптеген тілдерге аударылған, ең көп тиражды заманауи башқұрт кітабы. Кездесуде түрлі қызықты сұрақтар қойылды. Мысалы, «Әңгіме жазу кезінде сізде қандай қызықты жағдайлар болды?», «Егер сіз әңгімені жалғастырсаңыз, бұдан әрі не болар еді?», «Бұл жұмыста қандай қоғамдық мәселелер қозғалады?». Автор көптеген сұрақтарға толық жауап берді. Іс-шара жоғары деңгейде өтті. Саят Қамшыгер балаларға белсенді қатысқаны мен қызықты сұрақтары үшін алғыс айтты және мектеп әкімшілігіне кездесуді ұйымдастырғаны үшін ризашылығын білдірді. Кездесу соңында автор қатысушылар мен қонақтарға тілек сөздер айтты. Кездесуде жүйелі сұрақтар қойған оқушыларға Саят Қамшыгердің кітаптары тарту етілді. Айта кетейік, Саят Қамшыгер – ҚР Ақпарат саласының үздігі, ҚР Мәдениет саласының үздігі, «Алтын сақа» баспасының бас редакторы. «Менің алғашқы кітабым», «Менің сүйікті әліппем», «Менің алғашқы танымым», «Кім болам?», «Асыл мұра», «Үй жануарлары», «Жемістер», «Көкөністер», «Сандардың сыры», «Әріптер әлеміне саяхат» балалар әдеби кітаптары мен «Жүректегі ағыстар», «Сары гүл» жыр жинақтарының авторы.
Е.АСЫЛ.