Көктөбе орта мектебінде «Ұлтым бөлек болса да, жаным – қазақ» атты кездесу кеші өтті. Кеш қонағы ғалым, филология ғылымдарының докторы, профессор, Қазақстанның еңбек сіңірген қайраткері, «Парасат орденінің» және «Тіл жанашыры» құрмет белгісінің иегері Осман Асылы Әлиқызы болды.

Қазақ руханиятын саф алтындай қастерлеген зерделі жанмен кездесуге Қазақстаның Мәдениет қайраткері Балтабай Ибраев, ардагер ұстаз Айша Рақышқызы, облыстық «Тіл» оқыту-әдістемелік орталығы аудандық филиалының оқытушысы Айжан Сыздықова, мектеп директоры Айжан Талқамбаева, ұстаздар қауымы мен білім ордасының оқушылары қатысты. Кездесуді тарих пәнінің мұғалімі Ғазиза Қырбасова жүргізіп, қонақтарға кезегімен сөз берді.

Ең әуелі, кеш барысында Асылы Осман өзінің қиындыққа толы бала күнгі естелігімен бөлісіп, оқушыларды ана тілімізді құрметтеуге шақырды. Ұстаз бен шәкірт арасындағы қарым-қатынастың ізгі жолын көрсетіп, адамдарды сыйластық пен ұлттық бірлікте болуға үндеді. Кеш барысында аталған мектептің өнерлі оқушылары ән айтып, жалынды жыр оқып, би билеп өз өнерлерін ортаға салды. Оқушылар құрметті қонаққа көкейіндегі сұрақтарын қойып, ашық-жарқын жүздесу болды. Асылы Әлиқызы өзінің «Білім әлемдік, тәрбие ұлттық болу керек» деген тұжырымды ойымен бөлісе отырып, тек қана оқушылар емес, ұстаздар қауымына да білім беруде, тәрбие жұмыстарында неге мән беру керек екенін айтты. Асылы Әлиқызы сол бір қиын-қыстау кезеңде өзінің мүшкіл жағдайына қарамай, өзге ұлтты бауырына басып, оларға кең пейіл көрсеткен қазақ халқына деген сүйіспеншілікке толы лебіздерін кеңінен толғады.

– Менің бар қазынам – қазақ тілі. Өйткені, басқа ұлттар қиын-қыстау кезеңдерде өздерін қолтықтарынан сүйеп, барын алдына тосқан, тарыққанда қолпаштаған қазаққа қарыздар. Сондай мейірімділіктің арқасында осы күнге жетіп отырмыз. Сондықтан да, өз басым өле-өлгенімше қазақтың маған жасаған жақсылығына қайтарымым ретінде оның тілін барынша қорғап өтемін. Қазақтың қанына біткен ерекше қасиеттің бірі – артта қалғанды ілгері сүйреп, құлап бара жатқанды сүйейді, сүрініп кетіп жығылсаң, қолтығыңнан демеп, орныңнан тұрғызады. Мақтанғаным емес, қазақтың сол адами қасиеті маған да дарыған. Өз басым қазақты болмысынан адал, арамдықтан ада, жаны да, қаны да таза, ешкімді бөліп-жармайтын, алысты жақындататын, аразды татуластыратын, баршаның баласын жат деп жатырқамай, бауырына басатын, данышпан Абайдың сөзімен айтсақ, толық адам деп санаймын. Бүгінгі ұрпақ кешегі бабалардың бойындағы керемет қасиетін  әсте ұмытпау керек, – деп ағынан жарылды ана тіліміздің жанашыры.

Тағылымды жүздесуде ардагер ұстаз Айша Рақышқызы кездесудің келелі мәніне тоқталып, жас ұрпақтың ұлттық құндылықты бойына сіңіріп, елі мен жерін сүйіп есеюдің маңыздылығын сөз етті. Ал Қазақстаның Мәдениет қайраткері Балтабай Ибраев ұлттық өнердің қадір-қасиетін айтып, оны өскелең ұрпақ көзінің қарашығындай аялау керектігін жеткізді, әрі үкілі домбырасын қолға алып, жиналған жұртқа жырдан шашу шашты. Соңында Қазақстанның еңбек сіңірген қайраткері Асылы Осман жас бөбектің тұсауын кесіп, аталған білім шаңырағының ұжымына ризашылығын білдірді. Ал мектеп директоры Айжан Талқамбаева қадірменді қонаққа қазақ жосынымен сый-сияпат көрсетті.

Е.АСЫЛ.