Жаз мезгілінде тәтті тағамдарға деген сұраныс артады. Түрлі балмұздақ, торт, кәмпиттер мен десерттер - балалар мен ересектердің сүйікті тағамдарына айналады. Алайда осы тәттілер дұрыс сақталмаса немесе санитарлық талаптарға сай дайындалмаса, адам денсаулығына үлкен қауіп төндіруі мүмкін. Оның ішінде – уланудың қауіпі. Улану жағдайлары көбінесе сапасыз немесе мерзімі өтіп кеткен тәтті өнімдерді тұтыну салдарынан орын алады.
Тәттіден уланудың белгілері:
- Іш өту, құсу
- Іш ауыруы, іштің бұрап ауруы
- Бас айналу, әлсіздік
- Дене қызуының көтерілуі
- Тәбеттің жоғалуы
Бұл белгілер тағам арқылы уланудың алғашқы көріністері болуы мүмкін. Мұндай жағдайда дереу дәрігерге қаралған жөн.
Уланудың алдын алу жолдары:
- Тәттілердің сақталу мерзіміне мән беріңіз. Сатып алғанда қаптамасындағы жарамдылық мерзімін мұқият тексеріңіз.
- Сақтау шарттарын қадағалаңыз. Балмұздақ пен крем қосылған торттар тоңазытқышта сақталуы тиіс.
- Көшеде дайындалған өнімдерді тұтыну кезінде сақ болыңыз. Гигиеналық талаптарға сай келмейтін жерден алынған тәттілер денсаулыққа зиян келтіруі мүмкін.
- Балалардың тәттілерді тұтынуына бақылау қажет. Балалар тәттілерді мөлшерден тыс көп жесе, улану қаупі артады.
- Тәттілерді үй жағдайында дайындағанда тағамның құрамына кіретін өнімдердің сапасын бақылап, сенімді болу үшін оларды мұқият өңдеп, тазалап –жуып, талапқа сай жағдайда дайындап, пайдаланған жөн.
Тәтті тағамдар-қуаныш пен мерекенің ажырамас бөлігі. Дегенімен оларды таңдау мен тұтынуда мұқият болу -әр адамның өз денсаулығына деген жауапкершілігі. Саналы түрде әрекет етіп, уланудан сақ болайық!
Еңбекшіқазақ аудандық СЭББ
басшысының орынбасары Д.Бақберген
