Есік қаласында қыздарға арналған діни сауат ашу орталығы ашылды. Аталған орталықтың ашылу салтанатына ҚМДБ-ның тұңғыш төрағасы, «Парасат» орденінің иегері хазірет Рәтбек қажы Нысанбайұлы, ҚМДБ төрағасы, Бас мүфти Наурызбай қажы Тағанұлы, Ержан қажы Малғажыұлы, аудан әкімінің орынбасары Алтай Досымбаев және жамағат қатысты.

60-тан астам қыз балаға арналған ғимараттағы дәрісханалар заманауи үлгідегі компьютерлермен жабдықталған. Дәрістен тыс ісмер қыздар үшін тігін машиналары да қарастырылған. Асхана мен спорт залы бар.

Салтанатты іс-шарада Бас мүфти Наурызбай  қажы  Тағанұлы: «Қазақстан мұсылмандары діни басқармасының қоғам алдындағы міндеттерінің бірі – халықтың діни сауатын ашу. Бүгінде республика бойынша 900 мешітте діни сауат ашу курсы жұмыс істейді. Бұдан бөлек жастарды имандылық пен патриотизмге тәрбиелейтін 20 қайырымдылық мекемесі бар. Аллаға шүкір, бүгін елімізде тағы бір сауат ашу орталығы ашылды. Асыл дінімізде білім алу ардақталған һам қасиетті парыз саналған. Алла Тағала осы орталықтан білімді азаматтар шығуын нәсіп еткей» – деді. Өз кезегінде Наурызбай қажы Тағанұлы сауат ашу орталығына смарт теледидарды сыйға беріп, аудан имамы Сапархан Айдарханұлын алғыс хатпен марапаттады.

Орталықтың ашылуымен арнайы құттықтай  келген аудан әкімінің орынбасары Алтай Досымбаев аудан әкімінің атынан жылы лебізін білдіріп, бұл игі шараның өңірдегі жарасымдылық пен рухани кемелденуге жол ашатынын айтты.

Жиылған жамағат алдында сөз алған хазірет Рәтбек қажы Нысанбайұлы сауапты іске ұйыт-қы болған демеушілерге алғыс білдіріп, батасын берді. «Қыз – болашақ ана, ұлттың анасы. Ол бүкіл ұлтты  тәрбиелейді. Қыздарымыз тәрбиелі болғанда ғана, біз келешегі кемел ел боламыз. Бұл орталықтың ашылуы сол игі іске жасалған қадамдардың бірі» – деп ақсақал ағынан жарылды. Есік қаласының орталық мешіті жанынан ашылған сауат ашу орталығы жергілікті кәсіпкер азаматтар мен «Кең болайық» қайырымдылық қорының демеушілігімен бой көтерген.

Ерзат Асыл.