Индира ТОКМУРЗАЕВА, дизайнер:

– Газетті алғаш беттеген күніңіз туралы естелігіңізбен бөліссеңіз?..

– Мен редакцияға келген күннен бастап газет беттедім деп айта алмаймын. 2006 жылы 1 қарашада мәтін теруші болып жұмысқа қабылдандым. Алғаш газет беттеген күнім әлі есімде. Газетті бірінші рет беттеген кезде қиналғаным рас. Мәтінін қалай қояды, суретін қалай таңдайтынымды білмейтінмін. Ол кезде менің тәжірибем аз болғандықтан, түннің бір уағына дейін отырған кездерім болды. Мені газет беттеуге үйреткен ұстазым дизайнер Рашида Рахманова, газеттің қай жерінде сурет, қай жерінде мәтін тұратынын сызып беретін Баянды аға болатын. Осы кісілер менің газет беттеуді үйренуіме  көп  еңбегін сіңірді.

– Жұмыстағы бір күніңіз қалай өтеді?

– Менің жұмыс күнім таңғы сағат 9-дан басталады. Газет беттелмей тұрып бірінші жоспарланады, сол жоспарға байланысты материалдар дайындалады, содан кейін ғана барып газет беттеледі. Материалдар алдыма келгеннен бастап маңыздылығына қарай бөлінеді. Жоспарға байланысты қай материал кету керек, қайсысы кетпеу керек соған қарап, газет беттеледі. Менің газеттегі бір күнім осылай өтеді.

Майя АКИРБАЕВА, дизайнер:

 – Дизайнер мамандарға жиі қойылатын сұрақтың бірі – кәсіби оқу қажет пе?

– Әрине. Ғылым мен технологияның қарыштап дамыған кезеңінде өмір сүріп жатқандықтан, күн сайын түрлі өзгерістер болып, өмірімізге жаңашылдық еніп жатады. Білгеніңді ары қарай дамытып, оқып-ізденіп, уақыт ағысымен бірге жылжып отыру маңызды. Дизайнер болу үшін 4 жыл жоғары оқу орнында оқып шығу мүмкіндігі болмаса, арнайы қысқа мерзімде оқыту курстары бар. Дизайнерліктің қыр-сырын біліп, кәсібилікті арттыру үшін солардан өту керек.

– Жұмысыңыз сізге қандай жауапкершілік артады?

– Дизайнерлік ең алдымен – шығармашылық. Ойша бейнелеу, мәтін мен иллюстрацияны үйлестіру, өңдеу, әрлеу...бәрі-бәрі шығармашылықты талап едеті. Сенің жасаған жұмысың – қорытындылаушы. Басылым бетіндегі кез-келген ақпарат, мейлі ол мақала немесе жарнама болсын дизайнердің жұмысы арқылы бенеленіп оқырманға жетеді.