Кәсіпкерлікті қолдап, шағын және орта бизнесті дамыту әлемдегі бәсекеге қабілетті елдерде қарқынды жүзеге асуда. Дамыған елдердің барлығы дерлік өздерінің әлеуметтік-экономикалық мәселелерін шешуде шағын және орта кәсіпкерлік нысандарына арқа сүйейді. Бизнес субъектілерін дамыту арқылы жұмыссыздықты жойып, мемлекет қазынасына түсетін салық көлемін арттырады. Бұл бағытта дамушы елдердің қатарында көш бас-тап тұрған Қазақстан да шетелдік тәжірибелерге сүйену арқылы көптеген жұмыстар атқаруда. Кәсіпкерлерді тегін оқытып, жеңілдетілген несие беріп, қайтарымсыз гранттар қарастырылуда. Құзырлы органдар тарапынан тексерісті де мейлінше қысқартты.
Мемлекет тарапынан көрсетіліп жатқан осындай қамқорлыққа ие болған көктөбелік кәсіпкер Расул Таиржанов бүгінде ағаштан түрлі жиһаз бен құрылыс заттарын жасауда. «Әке көрген – оқ жонар» – деген нақылды ұстанған Расул әке жолын қуып, кәсібінің жемісін көріп отыр.
– Әкем ағаштардан жиһаз бен тұрмысқа қажетті түрлі бұйымдарды жасайтын. Бала күнімнен жанында жүріп, қолғабыс ететінмін. Содан ағаштан бұйымдар жасау жаныма жақын – дейді Расул Таиржанұлы. Айтуынша, алғашында бұл кәсіпке аса қызығушылық танытпаған. Мектепті бітірген ол жоғарғы оқу орнына түскен. Мамандығы – жергілікті мемлекеттік басқару. Алған дипломы бойынша да бірнеше жыл қызмет атқарып, аудандық, ауылдық әкімдіктерде жұмыс істеген. Белгілі себептермен кәсіпкерлікке бет бұруды жөн санаған. Осылайша, қатты жиһаз бен құрылыс заттарын жасауды қолға алған.
– Кәсіп бастау оңай емес екен. Алғашында қажетті станоктарды тауып, кейбір құрылғыларды қолдан құрастырдық. Тапсырыстар қабылдап, ісіміз өрге домалады. Алайда, кәсіп бір орында тұрмай, үнемі даму үстінде болу керек – деген ол былтыр «Атамекен» кәсіпкерік палатасының аудандық филиалына барып, бір ай оқудан өткен. Бизнесті дамыту мақсатында 6 пайызбен 4 млн теңге жеңілдетілген несие алған. Қаражаттың барлығына ағаш оюға қажетті құрылғыларға тапсырыс берген. Қазіргі таңда адам қолымен істелетін жұмыс едәуір азайған.
– Мемлекет басшысы Қасым-Жомарт Тоқаев биылғы Жолдауында шағын және орта кәсіпкерлікке баса мән беруді тапсырған еді үкіметке. «Тиімді шағын және орта бизнес – қала мен ауылды дамытудың берік негізі. Шағын, әсіресе, микробизнес еліміздің әлеуметтік-экономикалық және саяси өмірінде маңызды рөл атқарады. Атап айтқанда, ең алдымен ауыл тұрғындарына тұрақты жұмыс береді, жұмыссыздықты азайтады. Сонымен қатар, салық базасын құрып, жергілікті бюджетті нығайтады. Сондай-ақ, жаппай кәсіпкерлікті дамыту санаға сіңген патерналистік пиғыл мен масылдықтан арылуға мүмкіндік береді» деген Президент кәсіпкерлерге үлкен қуаныш сыйлап, бизнесті дамытуға зор мүмкіндік жасады. Айталық, бүгінде біздің цехта үш адам тұрақты жұмыспен қамтылған. Үшеуі де жергілікті тұрғындар, көктөбеліктер. Бір ғана бизнес субъектісі арқылы өзімді қоса алғанда төрт адам жұмыспен қамтамасыз етіліп, жергілікті бюджеттің ұлғаюына өз үлесімізді қосудамыз – дейді.
Жұмыс барысымен танысуға арнайы барған бізге ағаштың біз білмейтін қыр-сырын ашып, өңдеу жолдарын көрсетті. Айтуынша, әр ағаштың өз ерекшелігі бар, бірі қатты болса, енді бірі жұмсақ, морт сынғыш келеді. Ал кейбірінің иілгіш қабілеттері жоғары. Сондықтан, жұмыс ағаш таңдаудан басталады. Кейіннен, оны арнайы құрылғымен кесіп, өңделеді. Қисық тұстары жонылып, тазаланады. Тесіктері арнайы қоспамен бекітіліп, боялады. Осылайша, бір бұйымның өзі бірнеше күн жасалады. Қазіргі уақытта тапсырыстың басым көпшілігі Алматы қаласы мен аудан аумағынан түседі. Негізінен, есіктер мен баспалдақтар.
Кәсіп заман талабына сай өзгеріп, дамып отыруы тиіс деген Расул Таиржанұлы алдағы уақытта да өндіріс көлемін ұлғайтпақ ниетте. Ол үшін ағаш өңдеумен айналысатын автоматтандырылған жаңа құрылғылар алуды жоспарлап отыр.
Адамгершілікті – ардың ісіне балаған Расул Таиржанов бүгінде ауылдастарына қол ұшын созып, көмек беруде. Айтуынша, ауыл жастары жиналып мектептің стадионын абаттандырып, қалпына келтіруде. Сонымен қатар, айналасына шамдар орнатуда.
С.НҰРАДИН.
