Тура бір жыл бұрын, 13 наурызда елімізде COVID-19 алғаш тіркелді. Коронавирус Германиядан келген екі отандасымыздан анықталды. Ал бір жылдан кейін бұл цифр коронавирусты пневмонияны қоса алғанда 276 мыңнан асты. 3529 адам көз жұмды.

Егер коронавирустың алдын алу бойынша мемлекет тарапынан жасалған шаралар болмаса, жұқтырғандар саны әлдеқайда көп болуы да мүмкін еді. Дәл сол сияқты, карантин талаптарына бойсұнып, бұл жағдайға жұрт жауапкершілікпен қараса, індетті жұқтырушылар әлдеқайда аз болатыны да –дәлелдеуді қажет етпейтін аксиома. Бүтін бір қоғам болғандықтан ондағы жағдайдың қай бағытта белең алатыны әрқайсымызға тікелей байланысты. Айдаладағы аралда жападан жалғыз күн кешіп жатқан жоқпыз. Күнделікті қызметке барамыз, елмен араласамыз. Яғни үнемі бір-бірімізбен байланыста, қатынастамыз. Бұл байланыс тізбегін үзіп, карантинге кетпеу үшін санитарлық-эпидемиологиялық талаптарды қатаң сақтауымыз керек. Өкініштісі, осыны көпшілігіміз ескере бермейміз.

8 наурызға орай берілген бірнеше күн демалыстан кейін коронавирусты жұқтырушылар саны елде ғана емес, ауданымызда да күрт өсіп кетті. Мысалы, өткен екі аптадағы мәліметке сәйкес, ауданда COVID-19-бен 20-22 адам тіркелсе, 10-16 наурыз аралығында коронавирусты жұқтырғандар саны екі есе өсіп, 45-ті құрап отыр.

Осыған байланысты Еңбекшіқазақ аудандық санитарлық-эпидемиологиялық бақылау басқармасы тұрғындарға үндеу жасап, санитарлық-эпидемиологиялық талаптарды қатаң сақтауға шақырады. «Әсіресе, алдағы наурыз мейрамына орай берілетін демалыс күндері ешқандай басқосу, жиын өткізбей, үйде болыңыздар! Күз бен көктемде жіті респираторлық вирустық инфекция асқынады. Қазір ЖРВИ маусымы жалғасуда. Сондықтан сырқаттану қаупі сейілген жоқ», – дейді Еңбекшіқазақ аудандық санитарлық-эпидемиологиялық бақылау басқармасының басшысы М.Азербаев.

Құралай МҰРАТҚЫЗЫ