Елдің тыныштығы мен жердің бүтіндігі ғана емес, қоғамның дамуы мен экономиканың өрлеуі үшін де негізгі фактордың бірі – ел бірлігі. «Бірлік жоқ жерде тірлік жоқ» деген сөз осыдан шықса керек.

130-дан аса ұлт пен ұлыс өкілдерін бір шаңырақ астына сыйғызып, бірлік пен татулықта күн кешіп отырған қазақ елі осынау «бірлік» атты ұғымның айқын мысалы екенін әлем елдері мойындады. Тағдыр тәлкегімен жерімізге қоныс аударған қаншама халық ата-бабамыздың кең пейілі мен ыстық мейірімінің арқасында киелі жерде тұрақтап қалып, ұрпақ өрбітіп, түтінін түтетіп отыр. Әрі Отанымыздың өркендеп өсуі жолында ортақ мақсатқа жұмылып, бір үйдің баласындай бірліктің туын желбіретіп келеді. Мұның барлығы да – Елбасының сарабдал саясатының үлкен нәтижесі деуге болады.

Қоғамдық келісім мен жалпыұлттық бірлікті нығайтуда ҚР Тұңғыш Президенті – Нұрсұлтан Назарбаевтың Жарлығымен 1995 жылы Қазақстан халқы Ассамблеясы құрылды. Сол уақыттан бері ҚХА тұтастық пен татулықтың жарқын үлгісі болып, өзіне жүктелген жауапкершілікті жоғары деңгейде орындап келеді. Этносаралық татулық пен жалпыхалықтық келісім – елдігіміз бен Тәуелсіздігіміздің мызғымас тірегі екенін ешқашан естен шығаруға болмайды.

Ерік АБИТОВ,

Алматы облыстық мәслихат депутаты