Қазақ халқының өмірлік тәжірибесінде «бірліктің» маңызы орасан зор. Бірлік адамдар арасындағы ынтымақтың, жарасымды татулықтың көрінісі, ел болудың бірден-бір алғышарты. Қазақ халқы бірліктің күнделікті тіршіліктегі орны мен маңызын «бірлік болмай тірлік болмас», «бірлік түбі – береке», «алтау ала болса, ауыздағы кетеді, төртеу түгел болса, төбедегі келеді» деп түйген. Бірлікті ыдыратып, ірітуші күш – күншілдік, іштарлық, араздық. Бірлік елдіктің, ұлт болып ұйысып отырудың басты кепілі.

Бірлік түбі – береке. Иә, ауызбірлік пен түсіністік, қарапайым сыйластық үстемдік құрған жерлерге қашанда нәтижелі істердің үйір болатыны белгілі. Біздің елімізде қалыптасқан ұлттар тұтастығы мен халықтар достығының арқасында бүгінде мемлекетіміз өркендеп, ілгері басып келеді. Біздің мемлекетіміздің басты жетістігі еліміздің ұлтаралық және дінаралық келісімі, өзара түсіністігі мен сыйластығы болып саналады. Қазақстанның көпэтносты халқының татулығы, ынтымақтастығы, бейбітшілігі біздің еліміздің баға жетпес байлығы.

Қазақстан ауылдық округі де этностар арасындағы достықты, келісімді, татулықты сақтап, дамып келе жатқан округтер қатарында. Тұрғындар санының басым көпшілігі қазақтар болғанымен де өзге ұлт өкілдерімен арадағы байланыс өте тығыз. Қазіргі уақытта округімізде қоғамдық-саяси, діни ахуал тұрақты. Ауыл тұрғындары мекемелерде, ұйымдарда ешқандай қақтығыстарынсыз, мемлекет саясатына оң көзқарас танытып, еңбек етуде. Бүгінгі күні қоғамымыздағы ауызбірлік, тұ-рақтылық пен туысқандық қарым-қатынас соның нәтижесі деп айта аламыз.

А.Оспан,

Қазақстан ауылдық округінің ақсақалдар алқасының төрағасы