Кез келген елдегі прогресс қорғаныстың қуаты мен әскердің әлеуетімен өлшенетіні ақиқат. Бұл тегін емес.  Себебі стратегиялық маңызға ие саланың қашанда сақ әрі дәуірге сай болуы – бүгінгідей алмағайып заманда баршаның көкейін тескен кесек  мәселе. Қазір әлем елдерінің қорғану тәсілдері мен соғыстың алдын-алу шарттары мүлдем  өзгерген. Әуелі, әскердің қарақұрым көптігі емес, жаужүрек жауынгердің озық техниканы меңгеруі мен кәсіби біліктілікті арттыруы – басты  міндет. Білікті сарбаздар қашанда ел қорғанысының тірегі саналмақ.

Біз сөз етіп отырған білікті сарбаздың бірі Қаракемер ауылында орналасқан 6654 әскери бөлімінің кинолог маманы Ерлан Байгенжинов. Ерлан Қазбекұлы 1986 жылы ауданымызға қарасты  Өрнек ауылында өмір есігін ашқан. Болашақ сарбаздың балалық шағы  тәуелсіздіктің  алғашқы  жылдарымен тұспа-тұс келіпті.

– Мен тәуелсіз елдің ұрпағы ретінде мектеп табылдырығын аттадым. Ол кезде өзім секілді балалардың жүрегінде жас мемлекеттің жарқын болашағына деген үлкен үміт болды. Сондықтан біздің буында тәуелсіз елдің қасиетін ардақтауды мұрат тұтқандар көп еді. Сол бала күнгі арманым  сарбаз болып сапта тұруыма түрткі болды, – дейді  Ерлан  Байгенжинов. Ол 2003 жылы мамыр айында мектепті бітіріп, сол жылы қарашада әскери борышын өтеуге шақырылған. Әскери борышын Шымкент қаласында өтеген жас сарбаз 2004 жылы қараша айында Қаракемер ауылында орналасқан 6654 әскери бөліміне кинолог мамандығын игеруге жіберілген. Білікті маман  2013 жылдан бері  6654 әскери бөлімнің  кинология орталығында аға маман-аға нұсқаушысы  лауазымында қызмет етіп келеді.

Ерлан  Қазбекұлының  қызметтік иті – «Олимпия» атты 3 жасар бельгиялық овчарка. Күні бүгінге дейін сарбазбен қатар оның қызметтік иті аудандық полиция қызметкерлерімен бірлесе көптеген қылмыстық  іске белсене  қатысып, түрлі заң бұзушылықтардың бетін ашты.

– «Олимпия» – өте сезімтал  және ақылды овчарка. Біз онымен бірге аудан көлеміндегі  жантүршігерлік қылмыстардың бетін ашқан кездеріміз болды. Ол – қылмыскерлердің ізіне түсудің қас шебері. Талай күдіктінің құрықталуына көкмектескенін көзім көрді. Міне, солай ақылды овчарка сан рет  жазықсыз жапа шеккендердің жанына медет бола білді,  –  дейді сарбаз.

Жауынгерлік қызметін адал атқарып, осы салаға елеулі еңбек сіңіргені  үшін Ерлан Қазбекұлы Ұлттық ұлан Бас қолбасшысының  арнайы төсбелгісімен, ҚР Ішкі істер министрлігінің, облыс және  аудан әкімдерінің  алғыс хатымен,  тағы сол сияқты көптеген марапаттарға ие болған.

–Тәуелсіздік пен Ұлттық ұлан – егіз ұғым. Қазақстан  тәуелсіздігінің 30 жылдығына орай ел тыныштығын көз қарашығындай аялаған Отан қорғаушылар күні мерекесімен барша Қазақстан азаматтарын шын жүректен құттықтаймын. Отан қорғау – әр азаматтың  қасеиетті борышы деп түсінемін,  –  дейді Ерлан Қазбекұлы.

Е.АСЫЛ