Отан қорғаушылар күні – өз Отанын қадірлеп, оның тарихын құрметтейтін, ерлік пен жауынгерлік күшке ие барлық ерлердің ортақ мерекесі. Айтулы мерекеде аудан әкімі Әлібек Жақанбаев, аудандық мәслихат хатшысы Бекет Ахметов, әкімнің бірінші орынбасары Айбек Бидаев, «Nur Otan» партиясы аудандық филиалы төрағасының бірінші орынбасары Қуат Байғоджаев, аудандық ардагерлер кеңесінің төрағасы Тілеулес Ұзақов бастаған топ Қаракемер кентінде орналасқан 6654 әскери бөлімі сарбаздарын кәсіби мерекесімен құттықтап қайтты.

Бүгінде 6654 әскери бөлімде  бөлімше командирлері мен сержанттар, байланыс мамандары, аспаз, брондалған техниканың механик-жүргізушісі, атқыш, радио-химиялық істер қызметіне көмекші патрульдеу бөлімшелерінің сержанттары сынды 20-ға жуық мамандық оқытылады.Ең әуелі  аудан әкімі Әлібек Жақанбаев бөлім командирі, полковник Еркен Жанабергеновпен әскери қосынның қару-жарақтарымен, ұрыс техникаларымен танысып, Ұлттық Ұлан сарбаздарының заманауи соғыс тәсіліне қалай дағдыланып жатқандығын барлады. Одан кейінгі салтанатты марапаттау шарасына қатысқан  Әлібек Әскербекұлы 6654 әскери бөлімі сарбаздарын кәсіби мерекесімен құттықтап, үздік қызметкерлерге Алғыс хат табыстады. Сонымен қоса әскери бөлімге теледидар тарту етті. Аудан әкімі: «Бар өмірін әскери іске арнап, күн-түн демей елін, жерін қорғап, өз қызметін мінсіз атқарып келе жатқан жауынгерлерімізге алғысымды білдіремін. Әр сүйем жер үшін ата-баба қонысын көздің қарашығындай қорғап жүрген ерлерді, жаужүрек, қайсар мінезді сардарларымыз бен сарбаздарымызды  бүгінгі мерекесімен шын жүрекпен құттықтаймын»,  – деп, ақ тілегін жеткізді.  Мерекелік шарада 6654 әскери бөлімінің  жауынгерлері есірткі іздеу, террористерді құрықтауға арналған жаттығу түрлерін көрсетті. Мерекелік шара айбынды әскери шерумен өз мәресіне жетті.

Ерзат Асыл