Неменеге жетістің, бала батыр?

       Қариялар азайып бара жатыр.

       Бірі мініп келместің кемесіне,

       Бірі күтіп, әнеки, жағада тұр, –

деп ақиық ақын Мұқағали Мақатаев жырлаған қариялардың қатары сиреп барады. Бүгінгі ұрпаққа Ұлы Жеңіс сыйлаған ардагерлеріміз саусақпен санарлық. Қазіргі таңда ауданымызда Ұлы Отан соғысының 4 ардагері тұрады. Ұлы Жеңіс мерекесінде аудан әкімі Әлібек Жақанбаев, мәслихат хатшысы Бекет Ахметов, ардагерлер кеңесінің төрағасы Тілеулес Ұзақов бастаған прокуратура, полиция басқармасы, қорғаныс бөлімі, 6654 әскери бөлім өкілдері ардагерлердің шаңырағына арнайы барып құттықтады.

Жылқыбай Тәжіқұлов, Николай Савраев, Мұзапар Шәріпов пен Солтанбай Жарықбасовқа Алматы облысының әкімі Амандық Баталовтың мерекелік құттықтауын жеткізген  Әлібек Әскербекұлы сый-сияпаттарын табыстады.

– Отан үшін қан майданда от кешкен ардагерлердің ерлігі – бүгінгі ұрпаққа өнеге. Қасық қаны қалғанша қайсарлықпен күресіп, фашизмге тойтарыс берген батыр аталарымызды әрқашан құрмет тұтып, жас ұрпақ соларға қарап бой түзеуі керек – деген аудан әкімі ардагерлерге алғыс айтып, ақ тілегін білдірді. Құттықтай келген топқа ризашылығын білдірген қарттар ақ батасын берді.

Сондай-ақ Әлібек Әскербекұлы 1 мамыр күні 102 жасында өмірден озған ҰОС ардагері Максим Утловтың шаңырағына барып, ардагердің туыстарын мерекемен құттықтады.

Ұлы Жеңіс күніне орай аудандағы ардагерлерге 1 млн теңгеден берілді. Сондай-ақ тыл ардагерлеріне, қаза тапқан әскерилердің отбасына, соғыста қайтыс болғандардың әйелдеріне 30 мың теңгеден, Тәжік-Ауған шекарасын қорғаған әскери қызметшілерге 50 мың теңгеден материалдық көмек көрсетілді.

Сардарбек НҰРАДИН