«Шелек ауылындағы Алматы облыстық мамандандырылған балалар үйі» коммуналдық мемлекеттік мекемесіне «Nur Otan» партиясының өкілдері арнайы келіп қайтты. Олардың құрамында болған «Nur Otan» партиясы Алматы облыстық филиалы төрағасының бірінші орынбасары Гүлнар Тойлыбаева және «Nur Otan» партиясы Еңбекшіқазақ аудандық филиалы төрағасының бірінші орынбасары Қуат Байғоджаев жұмыс барысымен танысып қайтты.
Шелек ауылындағы балалар үйінің негізі 1946 жылы қаланған. Балалар үйі 1974 жылы салынған 2 қабатты ғимаратта орналасқан. 2012-2013 жылдары ғимараттың сейсмотұрақтылығын күшейте отырып, күрделі жөндеу жұмыстары жүргізілді.
Балалар үйі «Шелек ауылының аудандық ауруханасымен» тығыз байланыста жұмыс жасайды. Аурухана мамандары бала денсаулығына бей-жай қарамағандықтан, жылына 2 рет балаларды тереңдетілген медициналық тексеруден өткізеді. Тәулік бойы жұмыс істейтін медициналық көмек пен балаларға күтім жасау 24 мейірбике мен кіші медициналық персоналдың міндетінде.
Жетімін жылатпаған халықпыз. Мемлекеттік мекеме туғаннан бастап үш жасқа дейінгі жетім, төрт жасқа дейінгі психикасының және дене бітімінің дамуында кемістігі бар, ата - анасының қамқорлығынсыз қалған балаларға арналған.
Осыншама пендеге жан жылуын сыйлаған Мекеме директоры Отарбаева Зауре Отарбайқызы, басшы лауазымында 2016 жылдан бастап жұмыс істейді. Қазіргі уақытта балалар үйінде 0-ден 4 жасқа дейін 13 бала тәрбиеленуде. Оның ішінде 12-сі ата-анасының қамқорлығынсыз қалған, 1-уақытша тұратын балалар. Бірақ тарыдай шашылған тағдырластарды бір ортаға жинаған мекеме өзге ұлт өкілдерін де жатсынбады. Балалардың ұлттық құрамында 8-і қазақ, 2-уі орыс, 3-і басқа ұлт өкілдері. Жалпы 8 қыз, 5 ұл бар.
Бүгінгі тағда балалар үйінің тәрбиеленушілері үшін барлық жағдай жасалған. Темірдей тәртіпке бағынатын мекеме өз қанатына қаншама тағдыр теперішіне ұшыраған балаларды қанатына алып, болашаққа нық сеніммен қадам жасап жатыр.
И.СҰЛТАН
