Сан-салалы өмірімізде өндірілетін тауарымыз, көрсетілетін қызмет түрлерімен қатар сапаға аса зор назар аударылып, бұл көрсеткішке қатаң талап қойылатыны белгілі. Осы тұрғыдан алғанда баспасөз өнімдері – газет-журналдар, кітап шығару саласына қойылатын талаптар ішкі мазмұны, оқырман сұранысына сай болуы, әр тарапты тақырыптарды қамту көрсеткішімен қатар басылымның сыртқы келбеті – дизайны мен көркемделу деңгейі де заман талабына сай болуы керек.

«Еңбекшіқазақ» газеті ел Тәуелсіздігінің алғашқы жылдарынан бері аудандық, қалалық газеттердің ішіндегі өтпелі кезеңнің қиындықтарына қарамай үздіксіз шығып келе жатқан басылым. Әрине сол кеңестік жүйенің ықпалынан шығып, өзінің тәуелсіз мемлекетін құру жолындағы еліміздің басынан өткен қиындықтар газет өндірісіне ықпалын тигізбей қоймаған еді. Рубль аймағынан шығып, өз теңгеміз өмірге келгенге дейін 7-8 айлап жалақысыз, баспахана қызметіне төлейтін қаржысыз қалған да жылдар болды. Жаңа нарықтық жағдайға төселе бастағандығымыздың бір айғағы – ҚР Кәсіпкерлікті дамыту саласындағы жетістіктері үшін облыс көлеміндегі өз саласындағы жеңімпазы атанып, ел астанасының Ақмола қаласына көшіп барған жылы Конгресс-Холда Елбасының қатысуымен өткізілген Кәсіпкерлер форумына жолдама алып, осы жолдар авторы сыйлық алған болатын.

Бүгінгі күндері де әлемдік індеттің кедергілеріне қарамай «Еңбекшіқазақ» газеті басылымының құрылтайшылығымен ғаламтор-интернетте тіркеліп, ақпарат айдынында қызмет көрсетіп отырған mezet.kz желілік басылымының жұмысы 2020 жылдың қорытындысымен газет шығару саласындағы АА категориясы бойынша жоғары бағаланып, «Сапа жұлдызы» белгісіне ие болды (суретте). Бұл аз ғана жетістігіміз редакция ұжымының, газеттің ең басты тапсырыс берушісі – оқырмандарымыздың жеңісі деп білеміз. Іске сәт!

Хайролла АХМЕТЖАНОВ,

Қазақстанның құрметті журналисі