Сәрсенбі күні аудан әкімі, «Nur Otan» партиясы аудандық филиалының төрағасы Әлібек Жақанбаев тұрғындарды қабылдап, азаматтардың жеке және әлеуметтік мәселелерін тыңдады.

Партия ғимаратында өткен қабылдауға келген Есік қаласының тұрғыны Майра Каракузиева Еңбекшіқазақ ауданаралық көпсалалы ауруханада көз дәрігері болып жұмыс істейді. 2014 жылдан бері үй кезегінде. Аудан басшысының айтуынша, қала тұрғыны бюджеттік ұйым қызметкері санаты бойынша жеке тұрғын үй қорынан жергілікті атқарушы орган жалдаған тұрғын үйге мұқтаж адамдар тізімінде 241-ші болып тұр. Қызметтік пәтерді алу үшін өзі жұмыс істейтін ұйымның тұрғын үй комиссиясына жүгінуге болады. Сондай-ақ былтыр медицина қызметкерлерін тұрғын үймен қамтамасыз етуге жергілікті бюджеттен 112 млн теңгеден астам қаржы бөлініп, Есік қаласы мен Шелек ауылында 15 пәтер сатып алынған.

Аудан орталығының тұрғыны Раушан Төлепова Алматы көшесіндегі аяқсыз қалған тротуар мәселесін көтерді. Былтыр басталған жөндеу жұмыстары соңына дейін жүргізілмей, қала орталығының сәнін кетіріп тұр. Әлібек Әскербекұлы мердігер атанған  «Kaz Damu Leaders» ЖШС жөндеу жұмыстарын келісім-шарт негізінде уақытында аяқтамағандықтан, қала әкімдігі сотқа бергенін айтты. Қазіргі уақытта кешеуілдеген жаяу жүргінші жолының мәселесі сотта қаралуда.

Қабылдау барысында жаңашарлық Медетхан Игіліков те жол мәселесі бойынша сауал қойды аудан әкіміне. Айтуынша, Ават – Жаңашар – Космос – Базаркелді тас жолын күрделі жөндеуден өткізу жұмыстары басталып кеткен. Алайда, құрылыс Жаңашар ауылына дейін созылып, жолдың көп бөлігі жасалмаған. «Жөндеу жұмыстары жалғасын таба ма?» деген сауалға Әлібек Жақанбаев жоба 2021-2022 жылдарға жоспарланғанын айтты.

– Облыстық  маңызы бар Базаркелді ауылына кіреберіс жолын орташа жөндеу жұмыстары ағымдағы жылдың сәуір айында басталған болатын. Қазіргі таңда 800 метрге асфальт төсеу, жол жиектері мен белгілерді орнату үшін қаражаттың екінші траншы күтілуде. Айта кетерлігі, жоба 2021-2022 жылдарға жоспарланған. Мердігер мекеме «ЖҚБ-13» АҚ тарапынан жөндеу жұмыстарын биыл аяқтау үшін облыстық жолаушылар көлігі және автомобиль жолдары басқармасына ұсыныс берген – деді Әлібек Әскербекұлы.

Тұрғын үй салу үшін жер телімінде кезекте тұрған ақшилік Салтанат Мамесеитоваға аудан басшысы Ақши ауылында 90 гектар жерге инженерлік-коммуникациялық инфрақұрылым жүргізілетінін айтты. Құрылыс жұмыстары аяқталғаннан кейін азаматтар өз кезегімен жер теліміне қол жеткізетін болады.

Есік қаласының төменгі жағы мен Бөлек ауылы тұрғындарының шешілмей жүрген мәселесі – жаз мезгіліндегі ауызсудың тапшылығы. Жұртшылықтың осы проблемасын көтерген Злиха Мустапаеваға аудан орталығы мен жақын орналасқан елді мекендерді сапалы ауызсумен қамтамасыз ету жақын арада аяқталатыны айтылды. Ол үшін Есік топтық су құбырын жүргізуге бюджеттен 4 млрд 200 млн теңге қарастырылып, құрылыс жұмыстары басталып кеткен.

Сардарбек  НҰРАДИН