29 мамырда Үкімет отырысында денсаулық сақтау министрі Алексей Цой соңғы аптада коронавирус жұқтырғандар саны 39 пайызға артқанын айтты. Науқастардың 44 пайызы Нұр-Сұлтан мен Алматы қалаларынан екен.

Осыған байланысты елдегі бірқатар өңірде карантин шаралары тағы күшейтіліп жатыр. Оның ішінде екі үлкен мегаполиспен қатар Қарағанды, Батыс Қазақстан, Атырау облыстары да бар. Атырау демекші, бұл облыс – республика бойынша вакцинация қарқыны ең баяу өңір болып отыр. Мұнда бүгінге дейін 2 компонентті толық алғандар саны 50 мың адамға әлі жетпепті. Ал екпе алудан бірінші орында тұрған Алматы қаласының 300 мыңдай тұрғыны вакцинаны толық салдырған. Екінші орында Алматы облысы тұр. Мұнда 30 маусымдағы дерек бойынша 205 356 адам ковидке қарсы екпенің екі компонентін де алған екен. Ал жалпы қазақстандықтардың 2 млн-нан астамы вакцинаны толық салдырған.

Вакциналаудың тиімділігі зерттелгенін, сәуір-маусым аралығында вакцина алғандардың 1,3 млн-нан 3,2 млн-ға дейін өсуіне орай, ауру өсімінің екі есеге азайғанын айтқан А.Цой: «Дельта штамының пайда болуын және аталған штамға қарсы вакциналардың тиімділігін зерделеудің жалғасып жатқанын ескере отырып, вакцинация елдегі эпидемиологиялық жағдайға жағымды әсер ететінін айта кеткен дұрыс», – деп вакцинаның коронавирустан қорғанудың бірден-бір жолы екенін тағы ескертіп өтті.

Қ.МҰРАТҚЫЗЫ