Беттеу – кітап болсын, газет-журнал беттері болсын, басқа да полиграфия түрлерін әрлеу үдерісі. Басылымды типографияға жіберер алдындағы шешуші «түрі» мен оқырмандар үшін сыртқы тартымдылығы беттеушінің жұмысына байланысты. Беттеуші мәтінді орналастырып, тақырып шрифтін, суреттердің көлемін таңдап, түстері жағынан үйлестіріп, біртұтас «дүние» жасап шығарады.
Табанды еңбек пен асқан жауапкершілікті талап ететін бұл мамандық иесі шығармашылыққа да жақын болуы керек. Кейбір кездері дайындап қойған жұмысыңа өзгеріс енгізу керек болып, бір беттегенді қайта жасап жатамыз. Шыдамдылық қасиеті сыналатын кез осы болар. Өз ісін мінсіз атқарумен қоса оқырманға эстетикалық ләззат сыйлау беттеушінің басты міндеті деп білеміз. Кейде әдемі беттелген газетті парақтай отырып, еңбегіміздің жемісіне сүйсінеміз. Біз үшін беттеуші – нағыз көркемдіктің үйлестірушісі. Біз үшін журналистердің сөзбен салған суретінің ажарын ашқаннан артық сый бар ма?!
Барша әріптестерімізді келе жатқан кәсіби мерекемен құттықтаймыз!
Майя Акирбаева,
Индира Тоқмұрзаева,
дизайнер-беттеушілер.
