Елбасы Н.Назарбаевтың «Қазақстан-2050»: «Бір мақсат, бір мүдде, бір болашақ» атты Жолдауында: «Енді ешкім өзгерте алмайтын бір ақиқат бар! Ана тіліміз Мәңгілік елімізбен бірге Мәңгілік тіл болды. Бұл мәселені даудың тақырыбы емес, ұлттың ұйытқысы ете білгеніміз жөн. Біздің тіліміз мемлекеттің барлық жүйесінде қолданылуы үшін біз өзімізді өзіміз қамшылауымыз керек және осыған өзіміз атсалысуымыз қажет». Елбасының Жолдауындағы сөздерін барша ұлт өкілдері құптайды. Әлемдегі ең бай, ең сұлу тілдердің бірі – қазақ тілі. Тіліміз – бірлігіміздің тірегі, халқымыздың ұлттық байлығы.

Қазір Елбасы үш тілді білуді міндеттеп отыр. Болашақта бұл үлкен мәселе болмақ. Менің ойымша, егер адам өзге тілді білетін болса, ол рухани бай адам деп ойлаймын. Тіл арқылы басқа халықтың мәдениетін, дәстүрін үйренеді, басқа тілді үйрену арқылы танымы кеңейеді. Қазақ тілі күрделі әрі әдемі тілдердің қатарына жатады. Тіл байлығы – ел байлығы. Сондықтан барша қазақстандықтарды мемлекеттік тілді құрметтеуге шақырамын.

Біздің мәдениет үйіміздің қызметкерлері де тілді құрметтеуді өз отбасынан бастап зор үлес қосып келеді. Әлемге «қазақ» деген елдің барын, оның бай, әрі әдемі әуезді тілінің барын ән арқылы мойындатқан Димашымыз болды. Әлі де осындай өнерпаздардың осы бір жерден, ауылдан шығуы мүмкін ғой. Сондықтан да біздің мәдениет үйімізде ашылған шығармашылық, спорттық үйірмелерге қатысып жүрген жасөспірімдердің болашағынан зор үміт күтеміз. Өйткені олар мұнда қазақтың салты мен дәстүрінен, тереңнен бастау алар шежіресінен сыр шертер асыл өнерді, дәстүрлі ән-жырларды, күйлерді ең мықты, білімді де, білікті ұстаздардан үйреніп, сабақ алып жүр.

Диана Жакаева,     

Қаракемер ауылдық

мәдениет үйінің әдіскері