Президент Қасым-Жомарт Тоқаев айтқандай, қазақ тілі бүкіл халқымызды біріктіруші факторға айналуы керек. Осы тұста елімізде өтетін жалпыреспубликалық «Мен қазақша сөйлеймін» акциясының да орны ерекше. Бұл бастама Қазақ жерін мекендейтін этнос өкілдерінің қазақ тілін меңгеруіне, әрі өз ортасында дәріптеуіне түрткі болып отыр деуге толық негіз бар.

Акцияның VІ кезеңі құқық қорғау органдары мен ішкі істер органдары қызметкерлері арасында өтті. Қазақстан Республикасы Тәуелсіздігінің 30 жылдығын мерекелеу шеңберінде ұйымдастырылған бұл шараға еліміздің 15 өңірінен құқық қорғау органдарының 66 қызметкері қатысса, олардың екеуі біздің ауданнан болды. Белгілі қазақ ақындарының жыр жауһарларынан үзінділерді мәнерлеп жатқа оқып, акцияға белсенді қатысқаны үшін Еңбекшіқазақ аудандық полиция басқармасына қарасты Шелек полиция бөлімінің криминалисі, полиция лейтенанты, Азиз Омаров пен  Еңбекшіқазақ аудандық полиция басқармасының уақытша ұстау изоляторының айдауыл полицейі, полиция кіші сержанты Ильяр Баситов аудан әкімі Әлібек Жақанбаевтың Алғыс хатымен марапатталды.

Сонымен қатар аудандағы тіл саясатын жүргізуде қосқан үлесі үшін әріптесіміз – «Еңбекшіқазақ» аудандық қоғамдық-саяси газетінің тілшісі Құралай Мұратқызы Алматы облысы тілдерді дамыту жөніндегі басқарма басшысы Б.Керімбектің Құрмет грамотасымен марапатталды. Құрмет грамота мен Алғыс хаттарды табыстаған аудандық мәдениет және тілдерді дамыту бөлімінің басшысы Салтанат Беспаева марапатталушыларға қазақ тілі – халық бірлігінің негізі екенін айтып, мемлекеттік тілдің дамып, қанатын кеңге жая түсуі үшін болашақта да бірге жұмыс істеуге шақырды. 

Е.АСЫЛ