Қоғамның гүлденуін тежеп, түрленуіне тұсау болатын – жемқорлық, өкінішке қарай, әр салаға тереңнен енген. Мейлі білім, мейлі денсаулық саласы болсын, тіпті соңғы кездері сот жүйесіндегі жемқорлыққа қатысты былықтар да ашылып, онда да «бармақ басты, көз қыстының» бары анықталып жатыр. Әрине, бұл жағдай елдегі коррупцияның тамыры тереңде екенін көрсетеді. Сондықтан коррупциямен күреске бүкіл ел болып жұмылу керек-ақ.
Өткен аптада «Nur Otan» партиясы Еңбекшіқазақ аудандық филиалы жанындағы сыбайлас жемқорлыққа қарсы іс-қимыл жөніндегі қоғамдық кеңес отырысы өтті. Кеңес төрағасы, Алматы облыстық мәслихат депутаты Ерік Абитов жемқорлықтың қоғам өміріндегі кері әсерлерін жіпке тізгендей айта отырып, «Коррупциямен күресте, оның алдын алуда нақты нәтижеге жетуде әрқайсымыз жауаптымыз. Бұл қоғам алдындағы және ар алдындағы үлкен жауапкершілікті терең сезінгенде ғана қоғамдағы жегі құртқа айналған жемқорлықтан арыла аламыз. Осы орайда мемлекеттік мекемелерде сыбайлас жемқорлықтың орын алуына қарсы жасап жатқан жұмыстарды сараптап отырудың маңызы бөлек», – дей келе сөзді «Асы» бастауыш партия ұйымының төрағасы Ұлан Сағынбековке берді. БПҰ төрағасы ондағы жұмыстың мән-жайын жан-жақты таныстырып, сыбайлас жемқорлыққа қарсы іс-қимылдың 2015-2025 жылдарға арналған бағдарламасы қалай жүзеге асып жатқанын айтып өтті.
Одан кейін аудандық жұмыспен қамту және әлеуметтік бағдарламалар бөлімінің сектор меңгерушісі Анапия Нұрбатыров бөлімде сыбайлас жемқорлыққа қарсы іс-қимыл бойынша атқарылған жұмыс жайын баяндады. Комиссия мүшелері сұрақтарын қойып, ұсыныс, пікірлерін айтты. Кеңес төрағасы: «Ауруын жасырған өледі» демекші, бұл тақырыпты жабулы қазан күйінде қалдырмай, үнемі қозғап, мәселенің шешімін бірге іздеуіміз керек», – деп ойын қорытындылады. Иә, жемқорлықты жасырмай, оның фактілері анықталған жағдайда жария түрде халықты құлағдар ете отырып, заңды белшеден басқандарға тиісті жазасын берген жөн. Жалпы, сыбайлас жемқор-лықтың жиіркенішті іс екенін күнделікті айтып, құлаққа құйып отыру – үлкен күрестегі үлкен қадамдардың бірі.
Қ.МҰРАТҚЫЗЫ.
