2021 жыл – еліміз үшін айрықша, мерейлі де, мерекелі жыл. Тәуелсіздік алғанымызға биыл 30 жыл толды. Бұл – қайта жаңғырған қазақ мемлекетінің, ата-бабаларымыз аңсаған азаттықтың тұғыры нығая түскенін әйгілейтін маңызды белес. Тарих тұрғысынан алғанда, 30 жыл – көзді ашып-жұмғандай қас қағым сәт. Азаттығымыздың айшықты белесіне шыққанда «30 жылда біз қандай жетістіктерге жеттік? Келер ұрпаққа қандай жастарды аманаттаймыз?» деген сауалдар әрбір саналы азаматты толғандырары анық.

«Жас келсе – іске» дейді халқымыз. Жастар – қашанда тың идеялардың қайнар көзі. Оң өзгерістердің қозғаушы күші. Сондықтан Тәуелсіздік алған уақытта-ақ өскелең ұрпақтың осындай әлеуетін дұрыс арнаға бағыттап, тиімді пайдалану үшін елімізде жастардың дамуына жол ашып, жағдай жасалуда. Мысалы, егемендікке қолымыз жаңа жеткен, мемлекет үшін экономикалық қиын кезеңге қарамастан «Болашақ» бағдарламасы іске асты. Білімге құштар талай жас шетелдің озық оқу орындарында білім алып, бүгінгі күнге дейін бағдарлама жалғасын тауып келеді. Жоғары оқу орындарында Академиялық ұтқырлық бағдарламасы бойынша әр түрлі Еуропа елдерінде білім алмасу процесіне қатысуға мүмкіндік те бар. Сондай-ақ Тәуелсіздіктің үлкен жемісінің бірі – оқулықтардың өз тарихымыз бен мәдениетімізге, қазақы құндылықтарымызға сай жазылуы, елімізде қазақ мектептерінің көптеп ашылуы. Мысалы, біздің – Райымбек батыр атындағы орта мектепте алғаш 1994 жылы 2 қазақ сыныбы ашылған. Оның бірі 2-сыныпта – 13, ал 3-сыныпта – 14 оқушы, барлығы – 27 бала болса, биылғы оқу жылында мектебіміздегі 1355 оқушының 912-сі қазақ сыныптарында оқиды. Яғни азат елдің еркін ұландары өз елі, өз жерінде, бастысы, өз тілінде өз тарихын оқып жатыр. Бұл – Тәуелсіздіктің ең үлкен жемісі.

Ботагөз Жұмаділова,

«Ы.Алтынсарин» белгісінің иегері,

ардагер ұстаз