Кеше Мемлекет басшысы Қ.К. Тоқаев Қазақстан Республикасының Парламенті Мәжілісінің отырысына қатысып, елдің әлеуметтік-экономикалық дамуы, қауіпсіздік, саясатқа қатысты маңызды мәселелерді жіпке тізгендей жан-жақты саралап, Үкіметке бірқатар міндеттер қойды.
Білім, спорт, денсаулық сақтау, мәдениет салаларына үлкен қолдау көрсетілетінін айтты. Кешегі алаңдағы жағдай қайталанбауы үшін қауіпсіздік мәселесіне тоқталып, құқыққорғау жүйесіне реформа қажеттігін, шекара, күштік құрылымдар мәселесін көтерді. Әскерилерге, олардың техникалық базасына көңіл бөлу керектігін ескертті.
«Ең алдымен, еліміздің жаңа экономикалық тұғырын қалыптастыруды мықтап қолға алу қажет» деген Президент қаржы нарығындағы «былықтарды» да әшкерелеп, қарапайым халыққа әлеуметтік қолдау қажеттігіне тоқталды. Осы орайда «Қазақстан халқына» деген қор ашылып, ел игілігі үшін жұмыс істейтінін айтты. Билік пен халық арасында алшақтық болмауын ескертіп, халықпен бірге жұмыс істеуге шақырды. Сондай-ақ елімізде орындалатын барлық жобалар, қаржылық операциялардың ашық болуын, арнайы сайттарда тиісті мәліметтердің ашық жариялануын талап етті.
Президент Қ.Тоқаев осы және өзге де мәселелерді көтере отырып, «Халық үніне құлақ асатын мемлекет» қағидасының жарқын үлгісін көрсетті.
Сондай-ақ Тәуелсіздігіміздің мәңгілік болуы үшін ең алдымен тұрақтылық пен бірлік қажет екенін баса айтты.
Еліміз аман, жұртымыз тыныш болсын.
Ерік Абитов,
Алматы облыстық мәслихат депутаты
