Алматы облысында бұрын сотталғандардың жасаған қылмыс саны 41 пайызға азайған. 2021 жылдың қорытындысы бойынша Алматы облысындағы тіркелген қылмыстардың жалпы санының 1,4%-ға өсуімен сипатталады. Бұл туралы «Jetisy' Media» ақпараттық алаңында белгілі болды.
Бұрын сотталғандар жасаған қылмыстардың саны азайғанымен тұрмыстық саладағы қылмыстар саны 5,6 пайызға өскен. Жыл ішінде «Полиция қолжетімді» қағидатын қамтамасыз ету бойынша жұмыстар жүргізілді. Осы мақсатта учаскелік полиция инспекторларын жүйелі түрде нығайту, материалдық-техникалық қамтамасыз ету мәселелері пысықталды.
Қазіргі таңда облыста 270 учаскелік полиция пункті болса, оның 182-сі тұрғын үймен біріктірілген. Ағымдағы жылы тағы 38 осындай нысан салу жоспарлануда.
Кәмелетке толмағандар арасындағы құқық бұзушылықтың алдын алу мәселесі өзекті болып табылады.
Жыл қорытындысы бойынша кәмелетке толмағандармен жасалған қылмыстардың 27,1%-ға төмендеген, бірақ кәмелетке толмағандарға қатысты жасалған қылмыстардың 10,3%-ға өсуі байқалады.
Статистикалық мәліметтерге сәйкес, балаларға қатысты зорлық-зомбылықты негізінен жақын адамдары - аналары, әкелері, туыстары және таныстары жасайды екен.
Облыс жолдарындағы жол-көлік оқиғаларының көрсеткішіне келетін болсақ, 2021 жылдың қорытындысы бойынша Алматы облысының жолдарында жол-көлік оқиғаларының 4,6 пайызға өскені тіркелді. Жол апатынан 463 адам қаза тауып, 3231 адам жарақат алған. Адам өлімімен аяқталған жазатайым оқиғалардың саны 16,2%-ға өсті.
«Жол-көлік оқиғаларының негізгі себептері көлік жүргізушілерінің жол қозғалысы ережелерін бұзуы», - деді Алматы облыстық полиция департаменті бастығының бірінші орынбасары Ержан Оразбеков.
Осыған байланысты жол қозғалысы ережелерін бұзу фактілерін анықтауға баса назар аударылуда. Мәселен, өткен жылдың сәйкес кезеңімен салыстырғанда жол қозғалысы қауіпсіздігін қамтамасыз ету бойынша жасалған әкімшілік хаттамалардың саны 56,4 пайызға артқан.
JETISÝ MEDIA
