Бодандықтың бұғауын бұзуға ұмтылып, 1986 жылғы желтоқсан көтерілісіне қатысқан азаматтармен Достық ауылындағы Алтынбике Бертаева атындағы орта мектепте кездесу өтті.
Шелек ауылдық округінің әкімі Сәкен Адихалиев пен желтоқсаншылар әуелі Шелек ауылындағы орталық саябақта орналасқан Отан қорғаушыларға арналған ескерткішке гүл шоқтарын қойып, көтерілісте қайтыс болғандарды үнсіз еске алды.
Желтоқсаншылар А.Бертаева атындағы орта мектепке жиналды. Мектеп оқушылары құрметті қонақтар Абайдола Разиев, Жұмақадыр Алиев, Жұмагүл Байсеркеева, Раушан Искакова, Бірлік Тансибаев, Айгүл Ұмтылдаева, Сағидолла Мергенбаев, Майгүл Рамазанова, Тұрсынхан Рысқұлова, Ұлболсын Сейітқазиева және Айдархан Мұрзабатырды салтанатты түрде қарсы алды. Басқосуда мектеп директоры Жанар Мұқалиева, округ әкімінің орынбасары Бауыржан Сокуров сөз сөйлеп, желтоқсаншыларды атаулы күнімен құттықтады. Жоғары сынып оқушыларының концерттік бағдарламасы көпшілік назарына ұсынылды. Сахналық қойылымдар көрсетілді, патриоттық өлеңдер оқылды. Оқушылардың сұрақтарына желтоқсаншылар жауап берді. Кездесу соңында қонақтармен естелік суретке түсті.
А.МӨКІШҰЛЫ.
