Жуырда «AMANAT» партиясы Еңбекшіқазақ аудандық филиалының кезектен тыс ХХХVІ конференциясы өтті. Жиынға аудандық мәслихат төрағасы Бекет Ахметов, аудан әкімінің орынбасары Ертай Нұрмаханов, партиялық бақылау комиссиясының төрағасы Асыл Байтулақов қатысты. Конференцияның модераторы, аудандық партия төрағасы Бағдат Рахимов конференцияның өту тәртібімен, көтерілетін мәселелермен таныстырды. Ауқымды шарадан делегат емес аудандық мекеме, этно-мәдени орталықтардан және үкіметтік емес ұйым өкілдері мен «Жастар рухы» жастар қанатының мүшелері де қалыс қалған жоқ.
Күн тәртібіндегі бірінші мәселе бойынша Үкіметтің кеңейтілген отырысында Мемлекет басшысы Қасым-Жомарт Тоқаевтың тапсырмаларын іске асыру шаралары туралы баяндау үшін аудан әкімінің міндетін атқарушы Ертай Нұрмахановқа сөз берілді. 2023 жылы аудан көлемінде негізгі 7 бағыт бойынша нақты атқарылған шаруаларға тоқталған Ертай Нұрмаханов өз кезегінде:
– 2023 жылы ауданға 38,9 млрд теңге салық түсті, 2022 жылмен салыстырғанда 8,4 млрд теңгеге артық. Ағымдағы жылы салықтық түсімдер көлемінің жоспары 50,3 млрд.теңге, осы орайда ауылдық округ әкімдері жоспарды орындау мақсатында жұмыс жүргізуі қажет – деді.
Ертай Нұрмахановтың мәліметінше, «Жаңа инвестициялық кезеңді бастау» бағытында да оң өзгерістер бар. 2023 жылы негізгі капиталға салынған инвестициялар 83,9 млрд теңгені құраған. Ағымдағы жылы ауқымды 6 жобаны іске асыру жоспарлануда. Нәтижесінде 88 млрд теңге көлемінде инвестиция тартылады деп күтілуде.
Өндіріс саласы да көңілге қонымды цифр-лармен өрнектелді. 2023 жылы өндірілген өнім көлемі 88 млрд 462,4 млн теңгені құраған.
Агроөнеркәсіп кешенін дамыту және су ресурстарын үнемдеп пайдалану бағыты өз қарқынын жоймаған. Ауыл шарушылығының жалпы өнімі 195 млрд теңгені құраған. Айталық, 2023 жылы ауыл шаруашылығы мен балық өсіру шаруашылығында 8 жоба іске асырылған. 2,7 млрд теңге инвестиция тартылып, 74 жұмыс орны құрылған. Ауыл шаруа-шылығының материалдық-техникалық базасын нығайту мақсатында 2023 жылы 2,6 млрд теңгеге 141 техника алынған. Ауданымыз ауыл шаруашылығы саласы бойынша алдыңғы қатарда тұрғаны белгілі. Сол себепті бұл бағытта көптеген көлемді істер атқарылып жатқанынан хабардар болдық.
Электр қуаты, жылу, су, жалпы тиімді коммуналдық шарушылық – басты игілігіміз екені белгілі. Осы орайда ауданымыздың 7 елді мекеніне яғни Қызылжар, Нұра, Бәйдібек би, Ащыбұлақ, Рахат, Шелек, Қазақстан ауылдық округтерінде сумен қамту жүйелерінің құрылысы жүргізілуде. Одан бөлек биылғы жылы Есік қаласы, Түрген, Әймен, Қарасай, Өрікті, Бөлек су құбырларын жаңғырту жұмыстарын жүргізу жоспарланған. Бұдан бөлек жаңаруды қажет ететін бірнеше ауылдардың тізімі аталып, құжаттар әзірленіп жатқаны мәлімденді. Газбен қамту мәселесі де күн тәртібінен түскен емес, алдағы уақытта аудан тұрғындарын бұл мәселеде жағымды жаңалықтар күтіп тұр.
Сонымен қатар аудан әкімінің орынбасары көлік логистикасы, әлеуметтік сала, білім, денсаулық сақтау салалары бойынша 2023 жылда атқарылған және жоспарланған істер бойынша толық баяндады.
Конференцияда жастар ресурстық орталығының жетекшісі Қымбат Дәуке, Қазақстан бастауыш партия ұйымының төрағасы, аудандық мәслихат депутаты Мұхит Дунгешов, Малыбай бастауыш партия ұйымының төрағасы Разиям Таждинова, Ақши бастауыш партия ұйымының төрағасы Гүлмира Жанпейісова атқарылған жұмыстар жөнінде баяндамаларын оқыды.
Конференция соңында аудандық мәслихат төрағасы Бекет Ахметов партияластарын белсенділікке шақырды.
Ринат НАРХАНОВ.
