Кеңес әскерінің Ауған жерінен шығарылғанына 35 жыл толуына орай  Есік қаласында ауқымды іс-шара өтті. Алдымен қонақтар Ауған соғысының ардагерлеріне арналған орталықтағы ескерткішке гүл шоқтарын қойды. Еліміздің  мемлекеттік Гимні айтылып, соғыс кезінде мерт болған батырларымызды 1 минут үнсіздікпен еске алды. Ары қарай Т.Молдағалиев атындағы мәдениет үйінде  концерттік бағдарлама жалғасты. 6654  әскери бөлім сарбаздарының мемлекеттік Ту кіргізу рәсімі орындалды. Концерт басында  аудандық ішкі саясат бөлімінің басшысы Дархан Ахметов ардагерлерге алғысын білдірді.

 – Ардақты ағайын, құрметі соғыс ардагерлері, бүгін сіздер үшін тарихы терең, маңызды күн. Баршамыз Кеңес әскерінің Ауған жерінен шыққанына 35 жыл толуын атап өтудеміз. Бұл Қазақстан ғана емес,  ТМД елдері үшін де үлкен оқиға. Сіздер бейбіт өмірге араласып, отбасын құрып, саналы ұрпақ өсіріп, халық көшін алға жылжытуға, еліміздің дамуына үлкен үлес қостыңыздар. Сондықтан барлықтарыңызға шын жүректен алғысымды білдіремін – деді Дархан Ахметов. Концерт барысында «Улыбка» би ансамбілінің  «Қазақ биі» орындалып, Лала Бақытнұрқызы «Жез-киік», «Қаракемер» триосы «Мен қазақпын»  және Нұртас Қайратұлы «Ұлы дала – Қазақ-стан» әндерін шырқады. Дархан Ахметов  майдангерлерді марапаттап,  алғыс хаттар мен мерекелік медальдар табыстады.

    Айерке МЕРЕКЕҚЫЗЫ.