Елімізде мемлекет басшылығының бастамасымен «Таза Қазақстан» акциясы жүріп жатыр.  Астанадағы басқарушы органдардан бастап, облыс, аудан, ауыл-қала әкиматтары қызметкерлері, мекемелер ұжымдары галстуктерін шешіп тастап, қолдарына сыпыртқысын алып тұрмыстық қалдықтар аталған бос шөлмек, пластик пакеттер дейсіңбе, темекі тұқылдары, темекі қорапшалары дейсіңбе сыпырып-сыйырып тазартып жатыр.

Ал көше бойларын, демалыс аумақтарын, өзен жағалауларын ластап жатқан кімдер? Өзіміздің тұрғындар әрине. Жуырда бір танысым КВН-ге лайық сұрақ қойды маған. Бағдаршамның қызыл «көзі» жанғанда тоқтай қалған автокөліктің жүргізуші жақ есігі неге ашылады? Бұл сұраққа жауап бере алмаған соң менің «сауатымды» былай деп ашты: «Ол автожүргізуші насыбай деген пәлені шегеді де, тоқтаған жерінде түкіріп, ерніндегі былықты түсіріп тастау үшін есігін ашады» деп мені таң қалдырды. Өзен бойына, қаламыздың мөлтек аудандарындағы алаңдарына балаларға әткеншек, жастарға спорт құрылғыларын қою жалғасып жатыр. Ал бұрынырақ қойылған сол құрылғылар қиратылып, демалыс аумақтары ластанып жатқанын көзімізбен көріп тұрып неге  үн-түнсіз өте шығамыз?! Неге басбұзарға қой, тәртіп бұзба, өздеріңе арналған дүниені бүлдірме деп айта алмаймыз?

Мына суреттегі қоқыс жәшігін моторолер мінген азамат қопарып ішіндегі сыра, сусын қалбырларын теріп алып аяғымен жаншып дорбасына салды да, шашылған қоқысты, сындырған есігін қалдырып жүре бергені ғой..

Елімізді, қаламызды таза ұстауға шақырып, үлгі көрсетудей- ақпыз. Бастаманы қолдаушылар аз емес. Ал отырған жерін, қоғамдық орындарды ластаушылар қабылдан-ған тазалық ережелерін сақтамаса үгіттеуден гөрі айыппұл салумен басқа да заң талаптарын қолданып тәртіпке шақырған абзал болар.

Х.АХМЕТЖАНОВ.