Жуырда Шелек ауылындағы Жақсылық Үшкемпіров атындағы спорт кешенінде осы өңірде еркін күресті дамытуда өзіндік үлес қосқан профессор Асан Тоққожа-ұлының жүлдесіне арналған еркін күрестен жарыс өтті.

Жасөспірімдер арасында өткен бұл тартыс-ты бәсекеде Д.Қонаев, Алматы, Талдықорған қалалары, Алматы, Жамбыл, Түркістан, Жетісу облыстары, Райымбек, Талғар, Іле, Қарасай, Балқаш, Жамбыл, Кеген, Ұйғыр және Еңбекші-қазақ аудандарынан 2011-2012 жылы туған ұлдар мен 2011-2013 жылы туған қыз балалар боз кілемде белдесті.
Облыстық ашық турнирдің ашылу салтанатында қазақша күрестің бапкері болған, ардагер Асқарбек Рахимов ақсақал бата беріп, облыстық спорт басқармасының басшысы Ерболат Сарабеков сөз сөйлеп, облыс әкімі атынан Асан Тоққожаұлына шапан жауып, Алғыс хатын табыс етті. Одан кейін Алматы облысының құрметті азаматы Елеусіз Сұлтанғазиев, ардагер спортшы, Асекеңнің алғашқы баптан шығарған түлегі Абликим Розиев жылы лебіздерін айтып, жасөспірім балуандарға сәттілік тіледі. Бұл жүлделі жарысқа Асекеңнің туыстары, сыныптастары, шәкірттері, қызметтес әріптестері қатысып, сый-сияпаттарын табыс етті.
Үш күнге созылған тартысты бәсекеде жеңімпаздар мен жүлегерлер анықталып, арнайы медальдар, мақтау қағаздары мен заттай сыйлықтар табысталды. Ал І орынды иеленген қонаевтық «Жекпе-жек» командасы, ІІ орынды жеңіп алған №2 Шелек балалар мен жасөспірімдер спорт мектебі мен ІІІ орын иегері Талғар қаласының №1 БЖСМ-іне арнайы кубоктар табыс етілді.

Өз тілшіміз.