Черногорияның Будва қаласында бокстан жастар арасында өткен әлем чемпионаты өз мәресіне жетіп, байрақты бәсекеде қорамдық Елянұр Турганова чемпион атанды. Қазақстандық боксшылар командалық нәтижеде 6 алтын, 1 күміс, 10 қола медальді қанжығаларына байлап, бірінші орынды иеленді.
Алтын медальды жеңіп алған Қорам ауылының тұрғыны Елянұр Турганова 50 келі салмақ дәрежесінде алдына жан салмады. Елянұр өзбекстандық және грекиялық боксшыларды 5-0 есебімен жеңіп, айқын басымдық көрсетті. Ал ақтық сында бейтарап спортшы ретінде қатысқан Карла Пикті екінші раундта екі мәрте нокдаунға жіберіп, төрешілер бірауыздан жерлесімізді қолдады.
Әлемдік бәсекеде көк туымызды желбіретіп, еліміздің намысын қорғаған чемпионды Қорам ауылының тұрғындары думандатып, зор қуанышпен қарсы алды. Округ әкімі Тұрсын Еменбаев Е.Тургановаға, бапкері мен ата-анасына ризашылығын білдіріп, гүл шоқтарын табыс етті.
