Алматы облысының ауыл шаруашылығы тауар өндірушілері көктемгі егіс жұмыстарына белсенді түрде кірісті. Ағымдағы жылы ауыл шаруашылығы дақылдарының егіс алқабы 12,9 мың гектарға ұлғайтылып 436,8 мың гектарға жеткізу жоспарда бар. Бұл туралы баспасөз-мәслихатында облыстық ауыл шаруашылығы басқармасының бас маманы Олжас Молдатаев айтты.

Өнім мол болсын десек, шаруаларға қолдау көрсету керек-ақ. Өңірде тұқыммен айналысатын 29 субъекті бар. Оның 20-ы өсірсе, 9-ы оны өткізумен айналысады. Биылдыққа 63 мың тонна тұқым қажет, ол толығымен дайын тұр. Сонымен қатар, 60,8 мың тонна минералды тыңайтқыш қажет , оның 35,4 мың тоннасы қорда бар.

Көктемгі егістік және агротехникалық жұмыстарды жүргізуге дизель отынымен қамтамасыз ету бойынша жұмыстар жүргізілді. Биыл дизельдің 1 литр бағасы 250 теңге болып бекітілді. Бұл баға соңғы үш жылда тұрақты түрдеөзгеріссіз қалып отыр.

«Gosagro порталы арқылы 283 шаруа қожалығынан жалпы көлемі 5 154 тоннаға өтінім берілді»- деді Олжас Молдатаев.
Айта кетейік, жыл басынан «ҚазАгроҚаржы» ұйымы ауыл шаруашылығы техникасын жеңілдетілген лизингке беру бойынша өтінімдерді қабылданып жатыр.
Олжас Ерболатұлының айтуынша, биыл ауыл шаруашылығы техникасы паркін жаңартып, 520 бірлік жаңа техника сатып алу жоспарланған. Меже орындалса, техникалар 6,5 пайызға жаңарады.
Шаруалардың егіс науқанын атқаруы үшін «Агробизнес», «Кең Дала» бағдарламалары бойынша қаржыландыру қарастырылған, бұл фермерлерге қажетті ресурстарды уақтылы сатып алуға мүмкіндік береді.
«Көктемгі дала жұмыстарына «Кеңдала» несиелік бағдарламасымен ағымдағы жылы Алматы облысына 15,7 млрд. теңге бөлінген. Бүгінгі күні 2,3 млрд. теңгеге 56 өтінім келіп түсті»,-деді спикер.