Әрбір өркениеттің өріне қадам бастаған мемлекеттің ең басты тірегі, оның идеясы мен саясатын алға апарушы – мемлекеттік қызметкер болып табылады. Сол себепті де, ұлт мәртебесін көтеретін, ел абыройын асқақтатар мемлекеттік қызметші болу – мәртебелі міндет. Елімізде жыл сайын дәстүрлі түрде 23 маусым күні мемлекеттік қызметкерлер күні мерекеленеді. Маңызды салада, қалтқысыз қызметтерін танытудан жаңылмаған жандардың құрметіне аудандық Т.Молдағалиев атындағы мәдениет үйінде салтанатты шара өтті. Мерекеге аудан әкімі Талғат Байеділов, аудандық мәслихат төрағасы Бекет Ахметов, мемлекеттік саладағы еңбек ардагерлері, мемлекеттік қызметкерлер қатысты.

Салтанатты мерекенің шымылдығы мемлекеттік Гимнмен ашылды. Аудан әкімі Талғат Ескендірұлы құттықтау кезегінде:

– Бүгінгі кәсіби мереке – халық мүддесіне қызмет етуді өмірлік ұстанымына айналдырған адал азаматтарға көрсетілген шынайы құрмет. Елге қызмет ету – ардың ісі, ұлтқа адал болу – үлкен жауапкершілік. Мемлекет басшысы Қасым-Жомарт Кемелұлы Тоқаев «Мемлекеттік қызмет – бұл өз еліне және халқына қызмет ету. Бұл – ерекше кәсіп», деп барша мемлекеттік қызметшілердің кәсіби болмысы мен азаматтық ұстанымының айқын айғағын нақтылаған болатын.

Мемлекеттік қызметші – халық пен биліктің арасын жалғайтын алтын көпір. Қай кезеңде де бұл мамандық иелерінің адалдығы мен абыройы ел тағдырына тікелей әсер етіп келген.

Сондықтан әрдайым биік талаптардан таймай, кәсіби шеберлікті жетілдіре отырып, жаңғыру үдері-сінің белсенді қатысушысы болуымыз қажет. Ауданымызда 335 мемлекеттік қызметші еңбек етуде. Орташа жас – 45 болса, қызметкерлердің 65%-ы – әйелдер. Мемлекеттік қызметтің сапалық құрамының жаңарып, гендерлік теңдіктің орын алғанын аңғаруға болады. Бүгінгі таңда мемлекеттік қызметшілердің қатарында Президенттік жастар кадр резервінде 2 қызметші бар.Одан бөлек, ауданымызда жоғары оқу орынды GPA 3,2 балмен бітірген түлектер конкурстан тыс 2 мемлекеттік қызметші Бәйдібек би және Түрген ауылдық округі әкімі аппараттарына тағайындалды – дей келе, мемлекеттік саладағы тың серпіндер мен жаңалықтарды бөлісті. Әріптестерін алдағы уақытта да ел мүддесі үшін жүйелі жұмыс жасауға шақырып, ізгі тілегін білдірді.

Сахна төрінде аудан әкімі мерекеге арналған арнайы марапаттарды табыс етті. Ең әуелі Роза Омар-қызы, Серік Бейсенқұлұлы, Гульнара Дүйсебекқызы, Нұржамал Жұманқызы, Әзіл Кәрімұлы бастаған бірнеше еңбек ардагерлерін сахнаға шақырып, сыйлықтар табыстап, құрмет көрсетті. Есік қаласы әкімінің орынбасары Алма Болатқызына, Шелек ауылдық округі әкімі аппаратының бас маманы Сәуле Кабдушовнаға облыс әкімінің, аудан әкімі аппараты кадр қызметі бөлімінің бас маманы Аида Арманқызына мемлекеттік қызмет істері агенттігінің облыстық департамент бас-шысының алғыс хаттары табысталды. Сонымен қатар өз қызметінде іскерлігімен көзге түскен бірқатар мем-лекеттік қызметкерлер аудан әкімінің алғыс хаттарымен марапатталды.

Ардагерлер атынан Гульпям Маметова мемлекеттік қызметтің құндылығы жөнінде өнегелі әңгіме қозғап, құттықтау тілегін жеткізді. Сондай-ақ, мемлекеттік қызметке қабылданған жас мамандар ант қабылдау рәсімінен өтті.

Мерекелік кешке арнайы шақырылған эстрада жұлдыздары Ұшқын Жамалбек, Өмірқұл Айниязов рухты әндерін шырқады. Аудан әншілерінің орындауында «Атамекен» әнімен мерекелік шара өз мәресіне жетті.

Ринат НАРХАНОВ.