2025-2026 жаңа оқу жылы қарсаңында республика бойынша дәстүрлі «Мектепке жол» қайырымдылық акциясы басталды. Бұл туралы Алматы облысы Өңірлік коммуникациялар қызметінде өткен баспасөз мәслихатында Алматы облысы білім басқармасының бөлім басшысы Айжан Ізбасар мәлімдеді.

Акция 1 тамыз бен 30 қыркүйек аралығында өтеді. Мақсаты – жетім балаларға, ата-анасының қамқорлығынсыз қалған, әлеуметтік жағынан аз қамтылған және көпбалалы отбасылардан шыққан оқушыларға жаңа оқу жылына дайындық барысында қолдау көрсету.
– Биыл жалпыға міндетті білім беру қорынан 60 948 балаға 2,8 млрд теңгеден астам қаражат бөлінді. Әр балаға 46 228 теңге көлемінде көмек көрсетіледі. Бұл – соңғы үш жылмен салыстырғанда 2,5 есе артық көрсеткіш. Тамыз айының 20-сына дейін барлық қаражат ата-аналардың шотына аударылады. Сонымен қатар, кәсіпкерлер мен еріктілер тарапынан да қолдау көрсетілуде, – деді спикер.
Мемлекеттік көмектен бөлек, акция аясында қайырымдылық жәрмеңкелері, демеушілер есебінен киім-кешек пен оқу құралдарын тарату шаралары ұйымдастырылуда. Жергілікті кәсіпкерлер мен меценаттар бұл бастамаға белсене атсалысып отыр.
2024 жылы бюджеттен тыс қорлар есебінен 20 250 балаға көмек көрсетілсе, өткен жылы 56 974 оқушыға 2,4 млрд теңге бөлінген. Биыл бұл көрсеткіш 60 948 балаға жетіп отыр.
«Мектепке жол» акциясы – тек материалдық қолдау ғана емес, қоғамның әлеуметтік жауапкершілігін арттырып, балалардың білім алу құқығын қамтамасыз етудің нақты қадамы.