Алматы облысы бойынша Тексеру комиссиясы 2025 жылдың алғашқы жартыжылдығында жалпы сомасы 93,7 млрд теңгеден астам қаражатты қамтыған 5 тиімділік аудиті жүргізіп, 63 объектіні тексерді. Бұл туралы облыстық Өңірлік коммуникациялар қызметінде өткен баспасөз мәслихатында Тексеру комиссиясының мүшелері Қуаныш Есенаманов пен Ерік Бақытов мәлімдеді.

Аудит нәтижесінде жалпы 8,4 млрд теңгеден астам сомаға бұзушылықтар анықталды. Бұл аудитпен қамтылған қаражаттың 9,1%-ын құрайды. Өткен жылдың осы кезеңімен салыстырғанда бұл көрсеткіш 8,2%-ға артқан.

– Негізгі бұзушылықтар қаржылық есеп жүргізу мен бюджет қаражатын пайдалану тәртібін сақтамауға қатысты болып отыр. Қаржылық бұзушылықтардың жалпы сомасы – 3,2 млрд теңге. Оның ішінде 78,9 млн теңге бюджетке өтелуге тиіс, қалған бөлігі бухгалтерлік есепте қалпына келтірілуі қажет. Бұл – есеп жүргізудегі салақтық пен бақылаудың жеткіліксіздігін көрсетеді, – деді Қуаныш Есенаманов.

Сонымен қатар, аудит барысында 308,7 млн теңге көлемінде бюджет қаражаты мен мемлекеттік активтердің тиімсіз пайдаланылғаны анықталды. Ал 4,8 млрд теңге тиімсіз жоспарланған. Бұл, негізінен, бюджеттік өтінімдердің дәлелсіз жасалуы мен есептердегі ақпараттың дұрыс ұсынылмауынан туындаған.

– Мемлекеттік мүлікті тиімді басқару қағидаттары сақталмаған. Автокөлік сатып алу, теңгерімге тіркелмеген объектілерге шығын жұмсау және орындалмаған жұмыстар үшін мердігерлерге төлем жасау фактілері бар. Бұл бюджеттік тәртіптің әлсіздігін аңғартады, – деді Ерік Бақытов.

Тексеру барысында 111 процедуралық бұзушылық пен 5 жүйелі кемшілік тіркелді. Мемлекеттік аудит объектілеріне 49 міндетті тапсырма және 2 ұсыным жіберілді. Бүгінгі күнге дейін 16 тапсырма орындалған, қалғандарының мерзімі әлі жетпеген.

Анықталған бұзушылықтар бойынша 41 лауазымды тұлға тәртіптік, ал 140 тұлға әкімшілік жауапкершілікке тартылған. Бюджетке 14,4 млн теңге айыппұл өндірілді.