Жақында Малыбай ауылында Малыбай батыр ұрпақтарының демеушілігімен салынған жаңа саябақтың салтанатты ашылу рәсімі өтті.

Бұл игі шараға арнайы қонақтар, зиялы қауым өкілдері мен ауыл тұрғындары қатысты. Батырдың ұрпақтары былтыр ауылға келіп, жергілікті әкімнің келсімімен батыр атындағы саябақты салуға кіріскен болатын. Міне, енді, бұл ігі іс те аяқталып, тұрғындардың игілігіне берілді.

Саябақ ауыл халқының бос уақытында демалатын және мәдени шараларды ұйымдастыруға, серуендеуге арналған маңызды орынға айналмақ. Бұл бастама – елін сүйген ерлердің ұрпақтарының туған жерге деген құрметінің, тарихи сана мен рухани жалғастықтың жарқын көрінісі.

Саябақты ашу салтанатында округ әкімі Мәди Бектасов және батырдың ұпақтары, ауыл ақсақалдары сөз сөйлеп, лентасын қиды. Саябақтың ашылу құрметіне жиналғандар аты ауылға берілген, жоңғар соғысында ерлік көрсеткен әрі осы маңда өмір сүріп, тірлік еткен Малыбай батырдың ерен ерлігі туралы сөз сөйлеушілер тереңнен толғады. Батырға арналған ескерткіш тақтада батырдың өмірінен қысқа мәлімет жазылған. Салтанатты жиынның соңы концерттік бағдарламаға ұласып, ұлттық қолөнер көрмесі көпшілік назарына ұсынылып, өнерпаздар жиылған жұртшылыққа мерекелік көңіл күй сыйлады. Соңында батыр рухына арналған құдайы ас беріліп, ауыл ақсақалдары бата берді.

Белгілі журналист, жазушы, ақын, қоғам қайраткері, ұлтжанды азамат, Парламент Сенаты Баспасөз қызметінің жетекшісі, Қазақстан  Журналистикасы академиясының академигі Әділбек Қабаның «Малыбай батыр» атты  мақаласын ұсынып отырмыз.

Өз тілшіміз.