Қазақ тарихындағы заңғар тұлғалардың бірі – Бауыржан Момышұлы. Даңқты қолбасшының қас батырға тән өткір мінезі, құрыштай болмысы, ұлтжандылығы, Отан үшін от кешкен қаһармандығы, әдебиет әлеміндегі өлмес мұралары, өнегелі өмірі – ерліктің мінсіз үлгісі болып қала бермек. Осы орайда №1 Азат орта мектебі аңызға айналған тарихи тұлғаны ұлықтауда оң бас-тама жасады. Осы аптада аталған білім ордасындағы тарих кабинетіне Бауыржан Момышұлының аты берілді.

Аталған шараны мектеп ұжымы жоғары дәрежеде ұйымдастыра білді. Жағымды жаңалықпен танысу мақсатында танымдық шараға Рахат ауылдық округі әкімінің орынбасары Дина Мұңалбаева, аудандық білім бөлімінің әдіскері Нұржалғас Әскербек, ауылдық аналар кеңесінің төрайымы Райхан Жанбосынова және жеті бірдей мектептердің өкілдері келді.

Мектеп ұжымы әуелі «Адал азамат» атты біртұтас тәрбие бағдарламасының аясында атқарылып жатқан алты бірдей жобаның жұмыстарымен    таныстырды. «Шабыт», «Қамқор», «Ұшқыр ой», «Еңбегі адал», «Smart bala», «Балалар кітапханасы» жобалары бойынша жетекшілер мен оқушылар көрмелерін қонақтар назарына ұсынып, тыңғылықты жұмыстарын кең көлемде таныстырды. Түйгеніміз, аталған жобалар баланың – адал, еңбекқор, жауапты, отансүйгіш, қайырымды тұлға етіп шығаруда үлесі зор екенін дәлелдей түсті.

Уақыт Бауыржан Момышұлы атындағы кабинеттің ашылу салтанатына келді. Кабинеттің лентасын Нұржалғас Әскербек, Райхан Жанбосынова кесті. Өз кезегінде Нұржалғас Аралбайұлы, Дина Әскерқызы, Райхан Сексенбайқызы сынды бірқатар қонақтар мектеп ұжымының ізгі бастамасына жоғары баға беріп, халық қаһарманының ерлігі мен өрлігін тілге тиек етіп, қызметтеріне сәттілік тіледі. Тарих пәні кабинетінің ашылуына ұйытқы болған тарих пәнінің ұстаздары Гүлмира Оқасова мен Адалят Ниязова Бауыржан Момышұлы кабинетін арнайы таныстырып, мақсаты мен мәнін баяндады.

Шара барысында №1 Азат орта мектебінің директоры Аяла Дүйсеқожа мектепте «Жас заңгерлер» клубының құрылғанын хабарлап. Клуб тәлімгерлерінің ант қабылдау рәсімін тамашалауға шақырды. Танымдық шара мектеп оқушыларының Бауыржан Момышұлы туралы сахналық көріністерімен, патриоттық әндерімен жалғасты. Ауылдағы игі істің басында жүретін әжелер ансамблі де көрермен көңілін көтеретін халық әндерін тарту етті. Қорытынды сәтте қонақтар мектеп ұжымының жұмысына жоғары баға беріп, өздеріне қажетті мәлімет пен тәжірибе алғанын жасырмай, алғыстарын білдірді. 

Ринат НАРХАНОВ.