Соңғы онжылдықта туризм үздіксіз дамып, әлемдік экономиканың ең қарқынды өсіп келе жатқан секторларының біріне айналды. Бүгінде еліміздің туристік саласын дамытудың 2019 – 2025 жылдарға арналған мемлекеттік бағдарламасын қабылдады. Оның міндеттері ретінде ішкі және сыртқы туризмді, өңірлік мәдени-туристік кластерлерді дамыту басты бағыт іретінде қаралады. Қазір ауданымызда өңірлік туризмді өркендету үшін барлық қажетті мәдени, тарихи, географиялық және климаттық жағдайлар жеткілікті. Сонымен қоса қазір аудан көлемінде жергілікті туристік ортаның имиджін қалыптастыру және тартымдылығын арттыру бойынша қарқынды жұмыстар жүргізілуде.

Жақында аудандық балалар мен жасөспірімдердің туристік және экскурсия орталығында «Мектептердегі туристік-өлкетану үйірмелерін ұйымдастырудың ерекшеліктері» атты семинар өтті. Аталған семинарға спорт және туризм академиясы мен аталған орталықтың мамандары, мектеп мұғалімдері қатысты. Семинардың беташар сөзінде директордың тәрбие ісі жөніндегі орынбасары Бекзат Несипкулова орталықтың өткеніне тоқталып, оның  еліміздегі туристік саланың  дамуына  қосқан зор тарихи үлесін сөз етті. Ол осы жолғы семинардың мектептерде туристік-өлкетану бағытындағы үйірме сағаттарын тиімді ұйымдастыруды үйрету, болашақта өтетін түрлі жарыстарға оқушыларды қызықтыру мақсатында қолға алынып жатқандығын тіліне тиек етті. Жалаң қолмен жауға шаба алмайсыз, сол сияқты туристік жорыққа да жарақ-жабдықсыз шыға алмайсыз. Сондықтан кәсіби мамандар семинарға қатысушыларға ең алдымен туристік жеке және топтық құрал-жабдықтарды таныстырып, оны қалай тиімді пайдаланудың жолдарын  үйретті. Онан кейін қатысушыларға байлам түрлері, оны  жорық үстінде қалай кәдеге жаратудың қыр-сыры көрсетілді. Семинарға қатысушылар да түрлі байлам түрлерін пайдалануды сынап көрді. Сонымен бірге, от жағудың, шатыр тігудің, туристік өткелдердегі түрлі кедергілерден өтудің теориялық мазмұндары түсіндіріліп, практикалық әдістері көрсетілді. Өзен кешіп, тау асқанда қауіпсіздік бәрінен де маңызды. Сол себепті, семинарға  қатысушыларға туристік жорық кезінде түрлі қауіпсіздік ережелерін сақтау жайында жан-жақты мағлұматтар берілді. Қатысушылардың зор ынта танытқаны  соншалық олар мамандардан  үйренген түрлі әдіс-тәсілдерді  іс жүзінде  сынап көрмекке арнайы жарыс ұйымдастырды. Жарыста бақ сынағандар  көкейге тоқығандарын әйгілеуге, бар қарым-қабілетін көрсетуге тырысты. Семинарға қатысқан мұғалімдер өздерінің  туристік жорыққа қатысты көп мағлұмат алғандарын, алда туристік үйірмелерге белсене атсалысатындықтарын айтты.

Шара соңында қатысушылар арнайы сыйлықтармен марапатталды. Бұл ретте, Бекзат Несипкулова: «Біздің орталықты жергілікті билік құрлымдары жазғы лагер ретінде қарайды. Бірақ біз мектеп оқушыларын мәдени экскурсия мен туристік жорықтарға ұйымдастыратын кешенді орталықпыз. Сондықтан да ауданымыздың туристік әлеуетін арттыруға, жастарды елін, жерін сүюге насихаттауға барынша үлес қосқымыз келеді. Қазір мемлекет басшысы Қасым-Жомарт Тоқаевтың: «Жаңа жағдайдағы Қазақстан: іс-қимыл кезеңі» атты жолдауын іске асыру жөніндегі «Туған өлкем – мақтанышым» тақырыбында аудан мектептерінде туризм, экология және өлкетану жұмыс-тарын жүргізу мақсатында кешенді іс-шаралар жоспарын әзірлеп отырмыз. «Туған жердің қадірін жортқан білер», – демекші, біздің жас ұрпақ туған даланың  көркіне көз салып өскенде ғана, мекенсүйгіш бола түспек. Бүгінгі шара сол игі істің басы ғана. Біз алда балаларды отансүйгіштікке тәрбиелейтін, тарихи, мәдени құндылықтарды насихаттайтын көптеген іс-шараларды ұйымдас-тырмақпыз. Ойға алған іс көп, оның үдесінен шығу үшін өңіріміздегі барлық мектептерді біздің орталықпен бірлесіп ауданымыздың туризм  саласын ортақ өркендетуге шақырамыз»,  –  дейді.

Шараға қатысқан спорт және туризм академиясының мамандары да   Есік қаласында туризмді дамытудың мүмкіндігі зор екендігін, өйткені мұнда көрінісі  көркем жерлердің көптігін, сонымен бірге алып шаһарға жақындығын айтады. Олардың сөзінше, өңірлік туризмді дамыту үшін кәсіби мамандарды даярлау мен базаны нығайтудың маңызы зор. Туризмді дамыту ауданымыздың түлеуіне жол ашпақ.

Ерзат АСЫЛ