Өткенге тағзым жасау – өресі биік өсер елдің қарекеті. Осындай көргенді елдің ардақтылары бас қосып, Ақшидегі ұлы Отан соғысында қаза болған майдангерлерге арналған ескерткішті абаттандырды. Бұл қадамды биылғы Жеңістің 75 жылдық мерейтойына қосқан үлесіміз деп біледі ақшиліктер. Жуырда салтанатты ашылуы өтті.

Карантин жағдайына байланысты шағын форматта ұйымдастырылған салтанаттың ашылуына округ әкімі С.Айтбаев қатысып құттықтау сөзін жеткізді. – Сұрапыл соғысқа ауылымыздан 130-ға жуық жауынгер қатысып, 63-і елге аман оралған еді. округіміздің гүлденуіне өз үлестерін қосып, бейбіт заманды көріп өмірден озды. Міне, мемориалдың жаңартылуы да ерлікке тағзымның көрінісі. Бұл ескерткішке 132 майдангердің есімі қашалып жазылды, – дей келе игі іске ұйытқы болған округ ақсақалдар алқасының төрағасы Тұрғанбек Жұмағұловқа алғыс білдірді. Әлбетте, жақсының жақсылығын айту парыз.Себебі, жомарт жандар жиылып, жалпы саны 4 млн 880 мың теңгеге абаттандыру жүргізген. Осы ретте сөз сөйлеген Тұрғанбек Жұмағұлов:

– Ескерткіштің басталуына қолдау білдірген кәсіпкерлер Жақыпжан Мұсақұлұлына, Мұрат Омаровқа, Евгений Еременкоға, Бөкен Тікелдиевке, ауыл азаматтары Серік Карибаевқа, Ерлік Тамашаевқа, Серік Мұхамеджановқа, ақсақалдар алқасының мүшелері Мәулен Құдабаевқа, Тілеуғазы Жақыповқа тұрғындар атынан алғыс білдіремін, – деді.

1974 жылы салынған бұл ескерткіштің еңсесі тұралап қалғантын. Бүгінде айналасы абаттандырылып, мемориал тасы жаңаланды. Тіпті, мәңгілік алау да қойылған.

Салтанатты лента қию рәсімін ауыл ақсақалдары кесіп, гүл шоқтары қойылды. Кейіннен батыр бабалар рухына құран оқылды.

Қайнар ЖҰМАҒОЖА