Көше бойы мен қоғамдық орындар қызылды-жасылды жарнамамен толып тұр. Өкінішке қарай, сәні мен дизайнына көбірек көңіл бөлініп, мәтіннің мән-мағынасы ескерілмей қалады. Осынау жарнамаларды ілетін кәсіпкерлердің көпшілігі «Қазақстан Республикасының жарнама туралы» заңын белшесінен басып, өрескел қателіктер жіберіп жатады.
Мұндай заңсыздықпен күрес аудандық мәдениет және тілдерді дамыту бөлімі тарапынан ұдайы жүргізілуде. Рейдтер ұйымдастырылып, жарнамаға қойылатын заңды талаптар кәсіпкерлерге үнемі түсіндіріліп, ескерту де жасалып келеді. Өйткені мұндай қателіктер, біріншіден, қазақ тілінің дамуына кері әсерін тигізеді. Шет тілдерінде жазылған жарнамалар қазақ тілін өз елінде өгейсітсе, сауатсыз мәтін мен мазмұндағы қателік пен шалалық бай тілімізді мазаққа айналдырады. Ал екіншіден, жарнама жазылған материалдардың ескіруі мен бүлінуі, дизайнның сәйкеспеуі қала көркіне де кері әсерін тигізеді.
Осы мәселелерді терең ұғынған, әрі жарнаманы заң талабына сай орналастырған кәсіпкерлерді аудандық мәдениет және тілдерді дамыту бөлімінің басшысы Салтанат Беспаева арнайы марапаттады. Ел Тәуелсіздігінің 30 жылдығына орай «Ең сауатты жарнама» атты акция ұйымдастырып, өзге әріптестеріне үлгі болсын деген ниетпен ауданымыздың 10 кәсіпкерін заң талабына сай сауатты жасалған жарнамасы үшін үздік деп таныды.
Құралай МҰРАТҚЫЗЫ.
