Қаракемер ауылдық мәдениет үйінде ақын Арайлым Мамырбекқызының тәуелсіздіктің 30 жылдығына орай «Егемен елімнің ертеңімін» атты мерекелік шара ұйымдастырылды. Кеш балалар шығармашылығына арналып, тікелей көрсетілімде өтті.

Кештің шымылдығын, ақын, сазгер: «Карантин кезінде балаларымыз сахнаны жатырқап қалмасын, әлі де алда болатын байқауларға қатыссын деген ниетпен балаларға осындай бір кеш ұйымдастырып отырмыз» – деп алғы сөзімен ашты.

Мерекелік бағдарламаның ерекшелігі – сазгердің өз шығармашылығын өскелең ұрпаққа дәріптеу ғана емес, сонымен қоса өткен 2020 жылғы атаулы күндерді де шет қалдырмай ұлықтап өту. Атап айтсақ, Абай Құнанбайұлының 175 жылдығына орай, Абайдың «Ата-анаға көз қуаныш» атты туындысына ән жаздырған. Ал сахнада осы туындыны оның шәкірті Мерей Амангелдіқызы көрермен назарына ұсынды. Дина Нұрпейі-сованың 160 жылдығына орай, мәдениет үйінің музыкалық жетекшісі Ұлан Қали шәкірттер құрамымен «Тойбастар» күйін шертті. Мұқағали Мақатаевтың 90 жылдығына арнайы «Үш бақытым» өлеңіне жазылған Арайлым Мамырбекқызының әнін сахна төрінде республикалық және облыстық ән байқауларының лау-реаты Ханшайым Байбосынова орындады. Тәуелсіздігіміздің 30 жылдығына орай, Қаракемер балалар театрының директоры Жарқын Барақбаев «Тәуелсіздік жасасын» атты әнін шырқады. Жергілікті  «АРТ» би тобы қонақкәде ретінде көрермен назарына «Арулар» биін, ал «Қаракемер» триосы Сабыр Қалелұлының сөзіне жазылған Арайлым Мамырбекқызының «Қаракемер гимні» әнін орындады. «Талдыбұлақ» вокалдық тобы да өз өнерлерін сахна төрінде көрсетіп, көрермендерді  тәнті етті.

Кеш соңында Арайлым Мамырбекқызы қатысушы балалар мен көрермендерге өз алғысын білдіріп, өнер көрсеткен әр қатысушыға алғыс хат табыстады.

Айта кетсек, 2017 жылы Арайлым Мамырбекқызының жеке шығармашылық есеп беру кеші өткен. Әншілікте танылып жүрген өнер иесін халық ұстаздық, ақындық, сазгерлік қырларынан таныды және алғашқы жыр жинағының тұсауы да кесілді.

Маржан АҒЫБАЙ,

М. Қозыбаев атындағы СҚМУ-дың «Журналистика» кафедрасының 4-курс студенті.