Журналистердің кәсіби мерекесі қарсаңында аудан әкімінің міндетін атқарушы Айбек Бидаев өңірдегі бұқаралық ақпарат құралдары өкілдерін қабылдады. Аудан әкімдігінде өткен салтанатты жиында Айбек Дүйсембекұлы ардегер журналистер мен өңірдегі БАҚ құралдарының өкілдеріне Алғыс хаттар тапсырды. Жиынға ішкі саясат, мәдениет және тілдерді дамыту, спорт бөлімінің басшысы Салтанат Беспаева қатысып, журналистерді төл мерекемен құттықтады.

Қазір әлемдегі, тіпті еліміздегі жаңалықтар легі көз ілеспес жылдамдықпен жаңарып отырады. Бұл орайда халыққа күнделікті дұрыс, тексерілген ақпарат беретін журналистер қауымының еңбегі ерекше.

– Ауданымызда өңірлік журналистиканың бай тарихын жалғап, оның дамуына үлесін қосып жүрген білікті редакторлар, талантты тілшілер аз емес. Қазіргі журналистиканың басты талаптарының бірі – өңір  жаңалықтарын, өзекті мәселелерін оқырманына сапалы әрі жедел жеткізу. Әсіресе, ардагер журналистер ел Тәуелсіздігін нығайту мен өңіріміздің орынықты дамуына орасан зор үлес қосты. Бүгінде мемелекет басқа-ру ісіне жаңа талаптар қойылуда. Сондықтан қашан да сіздердің ақыл-кеңестеріңізге мұқтажбыз. Отбасыларыңызға амандық, кәсіби шебер-ліктің арқасында шығармашылықта толағай табыстарға жете беріңіздер! – деп ақ тілегін жеткізді Айбек Бидаев.

Жиналыста ардегер журналистер өңірлік баспасөздің міндеттері мен кейбір әлеуметтік мәселер жайында ой ортақтасты. Салтанатты жиын барысында аудандық «Еңбекшіқазақ» газетінің бас редакторы Хайролла Ахметжановқа, «Иссык» газетінің бас редакторы Ибрагим Кубековке, «ЮиТ» газетінің бас редакторы Айгуль Габсаттароваға, облыстық «Жетісу» газетінің тілшісі Болат Мәжитке, облыстық «Огни Алатау» газетінің тілшісі Ерқанат Уралбаевқа, республикалық «Уйғур авази» газетінің тілшісі Рашида Рахмановаға Алғыс хаттар табысталды. Саналы ғұмырын журналистикаға арнаған ардагерлеріміз де назардан тыс қалған жоқ. Өңіріміздегі мерзімді баспасөздерде елеулі еңбек еткен Әбілбек Айтақынов, Мұрат Нақатаев, Күләш Мадиярова, Ораз Тілекеев, Аманқожа Жұмабаев сынды бірқатар ардагер журналистерге Алғыс хаттар тапсырылды.

***   ***    ***

Төртінші билік өкілдерінің төл мерекесінде журналистер қауымы «АМАНАТ» партиясының да марапатына ие болды.