Т.Молдағалиев атындағы мәдениет үйінде ұстаз, сазгер Мейрамбай Бектасовтың «Ән ғұмыр» атты шығармашылық кеші өтті. Оған аудандық ішкі саясат, мәдениет, тілдерді дамыту және спорт бөлімі басшысының орынбасары Ермек Самсыбеков, Қазақстанның мәдениет қайраткері Балтабай Ибраев және өнер иесінің замандастары мен достары, әріптестері, шәкірттері, аудан  тұрғындары қатысты.

Сезімтал жүрегі сазды әуенмен үндескен Мейрамбай Бектасов елуге жуық авторлық әннің жарыққа шығуына себепкер болған. Сазгер аудан мәдениетін өркендетуге зор үлес қосуда. Шығармашылық кешті ашқан аудандық ішкі саясат, мәдениет, тілдерді дамыту және спорт бөлімі басшысының орынбасары Ермек Самсыбеков кеш иесін құттықтап, аудан әкімі Алтай Досумбаевтың алғыс хатын табыстады. Сондай-ақ иығына шапан жауып, сый-құрмет көрсетті. Кеш барысында журналист, ақын, Шаяхмет Құсайынұлы, ақын Кәмнұр Тәлімұлы, Дінмұхамед Қонаев атындағы Халықаралық қордың қамқоршылық кеңесінің мүшесі Дәулет Жанботаев сынды бірқатар азаматтар өнер иесіне жылы лебіздерін білдірді.

– Мейрамбай екеумізді табыстырған шығармашылық десем, қателеспеймін. Өнер иесінің жүрегінен талай әндер жарыққа шықты. Мәдениет саласына бар ғұмырын арнаған талантты жанның қазақ руханиятына, оның ішінде саз әлеміне берер құнды қазынасы жеткілікті. Барлық өнерін халқына арнаған сазгер жеті нота арқылы жеті жұрттың жүрегіне жол тапты, – деді қаламгер Шаяхмет Құсайынұлы. Сонымен бірге ұлағатты ұстаздың шәкірттері, ауылдастары, замандастары мен достары құрмет көрсетті. Өнерпаздар Мейрамбай Бектасовтың сазды әндерінен шашу шашып, кеш қонақтарының көңілін желпіді.

Е.АСЫЛ.