Ақши ауылындағы Бөлек батыр атындағы орта мектепте суретші-этнодизайнер, Қазақстан суретшілер және дизайнерлер Одағының мүшесі, Қазақстан Ленин комсомолы сыйлығының лауреаты, Қазақстанның еңбек сіңірген қайраткері, көптеген халықаралық байқаулардың дипломанты болған алаштың маңдайына біткен айтулы азамат Дәркембай Шоқпарұлына арналған «Дәркембай Шоқпарұлы: көрнекті қолөнер шебері, ұстаз, этнодизайнер» атты танымдық конференция өтті.

Аталған шараға атақты ұстамен араласқан, ол кісінің көзін көрген елімізге есімдері белгілі азаматтар, ғалымдар, суретшілер, өнерпаздар мен журналистер қатысты. Ең әуелі аудандық мәслихаттың хатшысы Бекет Ахметов дарынды өнер иесінің ұлт мәдениетіне қосқан үлесін тілге тиек етті. Ақши ауылдық округі әкімінің міндетін атқарушы Динара Ибраимова Дәркембай  Шоқпарұлының өмірі мен өнері жайлы баяндама жасап, сан қырлы дарын иесінің ұлт руханиятына жасаған қызметіне кеңінен тоқталды. Талғампаз талант тарланы Дәркембай – қолөнер түрлерін меңгеруде, үйрену мен жирену үдерістерін тәжірибеден өткізген ұстаз. Оған дәлел – 1996 жылы туған жері Ақши ауылында ашылған «Асыл» атты мектебі. Ол мектепnе республиканың әр жерінен келген шәкірттері тегін оқыды. Дәркембай Шоқпарұлы – тылсым тіршіліктің иірімдеріне терең бойлаған, киелі қолөнер пернелерін дөп басқан азамат. Өнері өтімді, іс-әрекеті ғұмырлы Дәркембай – қазақтың қайталанбас қолөнер иесі, өткен ғасыр өресіндегі ұлттық өнердің жанашыры. «Ұстаздық еткен жалықпас үйретуден балаға» демекші, Дәркембай шебер Т.Жүргенов атындағы Қазақ Ұлттық Өнер академиясында «Сәндік өнер және дизайн» факультетінде «Металды көркемдеп өңдеу» мамандығында студенттер оқытып, доцент және 2005 жылы профессор атағын алады. Дәркембай Шоқпарұлының тағы бір қыры – суретші әрі мүсіншілік өнері. «Студент қыз», «Алтын адам», «Қарасай батыр»6 т.б. портреттері бар. Танымдық конференция суретші, Қазақстанның Еңбек сіңірген қайраткері Қайырбай Зәкіров, ҚР мәдениет қайраткері Тоқабай Көшербаев, педагогика  ғылымдарының докторы, профессор, Абай атындағы ұлттық педагогикалық университеті ардагерлер кеңесінің төрағасы Берікжан Әлмұханбетов сынды зиялы қауым өкілдері хас таланыттың қайталанбас қолтаңбасы, ізденісі мен шығармашылығы, адами болмысы жайлы тереңінен сыр толғады. Конференция қонақтары алда ауданымызда қабырғасы қаланатын мектептердің біріне Дәркембай  Шоқпарұлының есімі берілуі керек екендіктерін айтып тарасты.                       

Е.АСЫЛ.