Кез келген мемлекеттің  дамуына мәдениеттің қосар үлесі зор. Мәдениеті мықты дамыған елдің еңсесі биік, рухы жоғары болады. Бүгінде өңіріміздің әлеуеті мен руханияты қатар өркендеп келеді.  Бұған ауданымыздың мәдениеті мен өнерін өрге сүйреген жандардың елеулі еңбегі дәлел бола алады.

Аудан әкімі Алтай Досумбев «Мәдениет саласының үздігі» төсбелгісімен марапатталған Қаракемер мәдениет үйінің директоры Арайлым Мамырбекова мен «Үздік театр ұжымы» – «Қаракемер» балалар театрының көркемдік жетекшісі Жарқын Барақбаевқа алғыс хат табыстады.

– Қазыналы Қаракемер – ежелден өнер қонған киелі қоныс. Қасиетті топырақта талай айтулы өнер тұлғалары өсіп-өнді. Олар өңірдің өнері мен мәдениетіне сүбелі үлес қосты. Әсіресе, ондағы жас ұрпақтың өнерге баса ден қоюы көңіл қуантады. Мұның барлығы сіздердің тынымсыз еңбектеріңіз бен ізденістеріңіздің нәтижесі, – деді Алтай Машикұлы.

Марапат иесі Қаракемер мәдениет үйінің директоры Арайлым Мамырбекова бұл жетістіктің кездейсоқ еместігін, осы белесті бағындыру үшін талай жылдар тер төккендігін айтты. «Қаракемер» балалар театрының көркемдік жетекшісі және қоюшы режиссері Жарқын Барақбаевтың «Қара шекпен», «Бала мерген» қойылымдары облыстық және республикалық байқауларда көрермен ықыласына бөленген еді. Ол бұл жетістігін жемісті еңбегінің жеңісі деп білетіндігін жеткізді. Үздіктер топ жарған өнер ордасы ауданымыз руханиятына әлі талай олжа салары анық.

Е.АСЫЛ.